malayshiya bilen shimaliy koréye otturisidiki sürkilish barghanche keskinleshmekte

türkiye awazi radiyosi xewiri: shimaliy koréye pirézidénti kim jung unning ögey akisining malayshiyada öltürülüshidin kéyin ikki dölet otturisida peyda bolghan sürkilishler barghanche keskinleshmekte.

malayshiya hökümitining shimaliy koréye elchisini «xalanmighan shexs»élan qilip, uni malayshyadin derhal chiqip kétishini telep qilishidin kéyin, piyongyang hökümitimu  piyongyangda turushluq malayshiya elchisini «xalanmighan shexs»élan qildi.

shimaliy koréye elchisi kang chol malayshiyadin chiqip ketti. elchi kang chol kim jung namning öltürülüsh weqesi üstide malayshiya dairiliri teripidin élip bérilghan tekshürüsh xizmetlirige ishenmeydighanliqini bildürgenidi.

malayshiyaning shimaliy koréye elchisi 20-féwralda kéngesh qilish meqsitide kualalumpurgha chaqirtilghanidi.

malayshiya saqchi idarisi mudiri xalid ebu bakar muxbirlarni kütüwélish yighini ötküzüp, kim jung namning suyiqestke uchrash délosigha chétishliq 3 shexsning hélihem shimaliy koréye elchixanisida yoshurunup turuwatqanliqlirini bildürdi.

ebu bakar shimaliy koréyelik mesullarning tekshürüsh xizmetlirige maslashmighanliqlirinimu éytti.

piyongyang hökümiti shimaliy koréyediki malayshiyaliqlarning shimaliy koréyedin ayrilishining waqitliq cheklengenlikini uqturdi.

malayshiya bash minisitiri nejip rizaq,  shimaliy koréyening bu qararining xelqara qanun we diplomatiye qaide- pirinsiplargha zit ikenlikini alahide eskertip, malayshiya puqralirining derhal qoyup bérilishini telep qildi.

bash ministir nejip rizaq saqchi idarisigha shimaliy koréyediki malayshiya puqraliri qoyup bérilmigüche malayshiyadin ayrilmaqchi bolghan barliq shimaliy koréye puqralirini tosup qélishqa yolyuruq berdi.

shimaliy koréyening kualalumpurdiki elchixanisimu malayshiya saqchiliri teripidin qorshaw astigha élindi.

shimaliy koréye pirézidénti kim jung unning ögey akisi kim jung nam, 13-féwralda kualalumpurdiki xelqara ayrodurumda suyiqestke uchrighanidi.

malayshiya dairiliri suyiqest délosigha chétishliq 7 shimaliy koréyelikni izdimekte.