kanadada yaghliq chegken ayal qanun kürishide ghelibe qildi

türkiye awazi radiyosi xewiri: kanada kubék ishtatining aliy sot mehkimisining sotchisi wilbord dékari yaghliq chegken musulman ayalgha qilinghan muamile toghrisida chiqirilghan sot hökümini élan qildi. u: «sotchi éliyana maréngoning qilghinining héchqandaq qanuniy asasqa ige emesliki körüldi. sot mehkimimiz raniya elallol xanimning héssiyatigha ortaqlishidu we uninggha qilinghan muamile tüpeyli chongqur epsuslinidu» dédi.

kubék aliy sotining qararidin söyüngen raniya elallol xanim bolsa, özige qilinghan muamilining xataliqini éytqan sotchining hökümini anglishining intayin ehmiyetlik ikenlikini bildürdi. elallol xanim her bir kishining xalighini boyiche kiyinishini, qaysi dingha étiqad qilishidin qetiynezer, sotqa bérishtin qorqmasliqini we özini bixeter hés qilishi lazimliqini tekitlidi.

ötken yili féwral éyida montréyal shehiride yüz bergen weqede, kubék ishtatliq sot mehkimisining sotchisi éliyana maréngo sotta yaghliq chégiwalghan raniya elallol xanimning béshini échiwétishni telep qilghan idi. sotchi éliyana maréngo sot zallirining sékular makanlar ikenlikini, sotchining aldida retlik kiyinip, bash kiyimi keymeslik we közeynek taqimasliq kéreklikini tekitligen bolup, raniya elallol xanimning yaghliqigha shu katégoriyede muamile qilghan idi.

qeyt qilinishiche, sotchi éliyana maréngo sotni dawamlashturush üchün raniya elallol xanimgha yaghliqni béshidin éliwétishni yaki adwokat tutup uni sotqa ewetishtin ibaret ikki shertni qoyghan. raniya elallol xanim bolsa, adwokat tutqidek pulining yoqluqini we yaghliqini diniy étiqadi sewebidin chiqarmaydighanliqini éytip, sotchining teleplirini ret qilghan. buninggha qarita, sotchi éliyana maréngo sotning qerelsiz kéchiktürgen.

mezkur weqe eyni waqitta, kanada bash ministiri justin tréduni öz ichige alghan nurghunlighan siyasetchi we kishilik hoquq teshkilatlirining naraziliqini qozghighan bolup, adwokatlar telep qilghan bolsimu sotchi éliyana maréngo raniya elallol xanimdin epu so rimighan. kubék sotchilar kéngishi raniya elallol xanimning adwokatlirining telipige qarita sotchi éliyana maréngo heqqide héchqandaq qarar almighan.