یوکرین:خیرسون میں جنگ جاری،آبادیوں کے انخلا کا حکم

روسی حکام نے خیرسون کے مرکزی شہر سے لوگوں کو انخلا کی ہدایت دے دی، حکام کا کہنا ہے کہ خیرسون کے علاقوں میں گولہ باری اور دہشتگرد حملوں کا شدید خطرہ ہے۔

خبر کے مطابق، روسی حکام نے کہا ہے کہ شہری فوری طور پر خطرے والے علاقوں کو چھوڑ کر دنیپر دریا کے پار چلے جائیں۔

خیال رہے کہ گزشتہ روز خیرسون میں یوکرینی فوج کی شیلنگ سے 4 شہری ہلاک ہوئے تھے۔

دوسری طرف یوکرینی صدر وولودومیر زیلنسکی کا کہنا ہے کہ روس نے گزشتہ رات یوکرین میں بڑے حملے کیے ہیں۔

انہوں نے کہا کہ روس ہمارے ملک میں مستقل دہشت پھیلا رہا ہے، گزشتہ رات بھی روس نے یوکرینی علاقوں پر 36 راکٹ داغے۔

زیلنسکی کا کہنا تھا کہ اہم تنصیبات پر فائر کیے گئے بیشتر روسی راکٹوں کو مار گرایا تھا۔

روس نے یوکرین میں توانائی تنصیبات پر فضائی حملے کیے، یوکرینی حکام کے مطابق حملوں کے بعد 10 لاکھ سے زائد صارفین بجلی سے محروم ہوگئے ہیں۔

حکام نے مزید کہا کہ روس نے گزشتہ چند روز میں یوکرین پر حملوں میں توانائی تنصیبات کو نشانہ بنایا ہے۔

دوسری جانب یوکرین نے دعوی کیاہے کہ اس کی فوج نے  روسی قوتوں کے زیر قبضہ  دو دیہاتوں کو آزاد کروا لیا ہے جبکہ  بیریسلاوا کے علاقے سے بھی روسی فوج نکل رہی ہے۔