اگر روسی صدر سے براہ راست ملاقات ہوجائے تو جنگ رک سکتی ہے:زیلنسکی

یوکرین کے صدر ولودومیر زیلینسکی کا کہنا ہے کہ روسی ہم منصب ولادمیر پوٹن کے ساتھ براہ راست ملاقات سے جنگ ختم ہو سکتی ہے۔

دارالحکومت کیف میں پریس کانفرنس کرتے ہوئے یوکرین کے صدر ولودومیر زیلینسکی کا کہنا تھا کہ یوکرین روسی صدر سے ملاقات کرنے کے لیے تیار ہوں اور پیوٹن سے ملنے سے خوفزدہ نہیں ہوں۔

زیلینسکی کا کہنا تھا روسی صدر پوٹن سے براہ راست ملاقات سے جنگ ختم ہو سکتی ہے، سفارت کاری سے جنگ ختم کرنے کا واحد راستہ صدر پیوٹن سے بالمشافہ ملاقات ہے۔

امریکی وزیر خارجہ انتھونی بلنکن کے دورہ یوکرین کے حوالے سے بات کرتے ہوئے یوکرین کے صدر کا کہنا تھا امید ہےکیف میں امریکی وزیر خارجہ اور دفاع سے گفتگو میں بھاری ہتھیاروں کے حصول میں کامیابی ہو گی، یقین ہے بھاری ہتھیار ملتے ہی ہم روس کے زیر قبضہ علاقے دوبارہ حاصل کر لیں گے۔

یوکرینی صدر نے اقوام متحدہ کے سیکرٹری جنرل کے کیف سے پہلے ماسکو جانے کے فیصلے پر تنقید کرتے ہوئے کہا کہ اقوام متحدہ کے سیکرٹری جنرل کے فیصلے میں کوئی انصاف اور کوئی منطق نہیں ہے۔

دوسری جانب سیٹلائٹ تصاویر میں یوکرین کے شہر ماریوپول میں اجتماعی قبر کا انکشاف ہوا ہے۔

اس حوالے سے یوکرین کے صدر ولودومیر زیلینسکی کا کہنا ہے کہ اگر ماریو پول میں یوکرینی فوجی مارے گئے تو کیف ماسکو کے ساتھ بات چیت ترک کر دے گا۔ 

دریں اثنا،یوکرینی وزیراعظم ڈینس شمیہل کا کہنا ہے کہ یوکرین کے شہر ماریوپول کی صورتحال خوفناک ہے، وہاں یوکرینی فوجی روسی فوج سے لڑرہے ہیں۔

ایک بیان میں یوکرینی وزیراعظم کا کہنا تھا کہ پچھلی صدیوں میں یہ سب سے بڑی انسانی تباہی ہے، تمام ممالک کے سفیروں کو کیف واپس آنے کی دعوت دیتے ہیں۔

انہوں نے مزید کہا کہ امریکہ جلد ہی یوکرینی دارالحکومت میں اپنا سفارتخانہ دوبارہ کھولے گا۔

خبر  کے مطابق برطانیہ نے گزشتہ روز کیف میں اپناسفارتخانہ اگلے ہفتے سے دوبارہ کھولنے کا اعلان کیا ہے جبکہ دیگر یورپی ملک بھی کیف میں سفارتخانہ دوبارہ کھولنے کا اعلان کرچکے ہیں۔

خیال رہے کہ دو روز قبل روسی وزیر دفاع نے یوکرین کے شہر ماریوپول پر قبضے کا دعویٰ کیا تھا، صدر پوٹن نے کامیاب آپریشن پر وزیر دفاع کو مبارکباد دی تھی۔