اگر ضرورت پڑی تو فوج دوبارہ شام پہنچ جائے گی: پوٹن

روس کے صدر ولادیمیر پوٹن نے کہا ہے کہ شام میں تعینات بیشتر روسی فوجی دستوں کے انخلا کے باوجود اگر ضرورت پڑی تو روس کے فوجی دستےچند گھنٹوں کے اندردوبارہ شام پہنچا دیے جائیں گے۔

گزشتہ روز کریملن میں منعقد ایک تقریب سے خطاب کرتے ہوئے روسی صدر نے کہا کہ ہمارے کچھ فوجی بدستور شام میں موجود رہیں گے جو صدر بشار الاسد کی حامی افواج کو ان کی پیش قدمی میں مدد دینے کےلیے کافی ہیں۔

انہوں نے کہا کہ وہ شام میں جاری تصادم میں اضافہ نہیں چاہتے اور پرامید ہیں کہ شامی حکومت اور حزبِ اختلاف کے گروہ عقل استعمال کریں گے اور کسی امن معاہدے پر متفق ہوجائیں گے۔

کریملن میں ہونے والی تقریب شام سے لوٹنے والے روسی فوجیوں کے اعزاز میں منعقد کی گئی تھی جس میں 700 سے زائد روسی فوجی اہلکار اور افسران شریک تھے۔

تقریب کے دوران صدر پوٹن نے شام میں "عمدہ کارکردگی" کا مظاہرہ کرنے والے روسی فوجیوں کو اعزازات سے بھی نوازا۔