"باکمال لوگ لاجواب خدمت" پی آئی اے نے استنبول کےلیے بھی پروازیں بند کردیں

قومی فضائی کمپنی نے ٹرکش ایئرلائن کے ساتھ کوڈ شیئرنگ کی جس کے نتیجے میں پی آئی اے اب استنبول کے لیے بھی اپنی پروازیں آپریٹ نہیں کرے گی۔

ٹرکش ایئر لائن کے ساتھ کیے گئے معاہدے کی رو سے ترک فضائی کمپنی  روزانہ استنبول سے کراچی، لاہور اور اسلام آباد کے لیے 6 پروازیں  چلائے  گی جبکہ پی آئی اے دبئی، ابوظہبی اور مسقط سے لاہور، کراچی اور اسلام آباد آنے والی پروازوں پر ترک ایئرلائنز کے مسافروں کو کوڈ شیئرنگ کی سہولت فراہم کرے گی۔

اس معاہدے کی رو سے پی آئی اے استنبول کے لیے اپنی پروازیں آپریٹ نہیں کرے گی، جبکہ اس سے ترکش ایئر لائن پر کوئی اثر نہیں پڑے گا کیوں کہ وہ ابوظہبی، مسقط اور دبئی سے پاکستان کے لیے کوئی پرواز آپریٹ ہی نہیں کرتی۔

شہری ہوا بازی کے  ماہرین نے اس معاہدے پر تنقید کرتے ہوئے کہا ہے یہ معاہدہ اس طرح کیا جاتا کہ استنبول تک پی آئی اے مسافروں کو لے کر جائے گا اور وہاں سے یورپ کے لیےٹرکش ایئرلائن کے جہاز استعمال ہوں گے تو اس طرح پی آئی اے پورے یورپ سے بزنس کرسکتی  تھی تاہم اب پی آئی اے نے استنبول کا ٹریفک بھی کھودیا ہے ۔