افغان صدر اشرف غنی پاکستانی رہنماوں سے ملاقات کی غرض سے اسلام آباد پہنچ گئے

افغان صدراشرف غنی پاکستان کے دوروزہ دورے پراسلام آباد پہنچ گئے ہیں۔نورخا ن ایئربیس پرمشیرتجارت عبدالرزاق دائود اوردیگرحکام نے افغان صدر کااستقبال کیا۔معززمہمان کو21توپوں کی سلامی بھی دی گئی۔

افغان صدر کے ہمراہ ایک اعلیٰ سطح کا وفد بھی پاکستان آیا ہے، جس میں افغان وزراء، تاجر، مشیر اور سینئر حکام شامل ہیں۔

 پاکستان کے دفتر خارجہ کی طرف سے جمعرات کو جاری بیان کے مطابق افغان صدر اشرف غنی کو دورہ پاکستان کی دعوت پاکستان کے وزیر اعظم عمران خان نے دی تھی۔

دفتر خارجہ کا کہنا ہے کہ اسلام آباد میں قیام کے دوران افغان صدر غنی اپنے پاکستانی ہم منصب عارف علوی سے ملاقات اور وزیر اعظم عمران خان کے ساتھ وفود کی سطح پر بات چیت کریں گے، جس میں مختلف شعبوں بشمول تجارت، سلامتی امن و مصالحت، تعلیم اور عوامی رابطوں کے فروغ پر بات چیت متوقع ہے۔

دوسری طرف افغان صدر کے ترجمان ہارون چکان سوری ایک بیان میں کہہ چکے ہیں کہ صدر اشرف غنی کے دورہ پاکستان میں پاکستانی قیادت کے ساتھ مذاکرات میں امن عمل سمیت چار معاملات پر گفتگو ہو گی جن میں علاقائی رابطوں، دو طرفہ تجارت، اور سکیورٹی کے معاملات شامل ہیں۔

دفتر خارجہ کے بیان کے مطابق صدر اشرٖف غنی پاکستان کے دورے کے دوران لاہور بھی جائیں گے جہاں تجارتی فورم میں شرکت کریں گے جس میں پاکستان اور افغانستان کے تاجر برداری کے نمائندے شرکت کریں گے۔

افغان صدر اشرف غنی ایک ایسے وقت میں پاکستان کا دورہ کر رہے ہیں، جب افغان امن عمل کی کوششیں تیز ہو گئی ہیں اور رواں ہفتے کے آخر میں امریکہ اور طالبان کے نمائندوں کے درمیان قطر کے دارالحکومت دوحہ میں بات چیت کا ساتواں دور شروع ہو رہا ہے۔ اس تناظر میں تجزیہ کار صدر اشرف غنی کے دورے کو اہم قرار دے رہے ہیں۔

افغان صدر اشرف غنی دورۂ پاکستان کے دوران صدرِ مملکت ڈاکٹر عارف علوی اور وزیر اعظم عمران خان سے ملاقات کریں گے۔

ترجمان دفتر خارجہ کے مطابق افغان صدر اور وزیر اعظم عمران خان کے مابین وفود کی سطح پر ملاقات ہوگی، جس میں مختلف شعبوں میں پاک افغان تعاون کو فروغ دینے پر بات چیت کی جائے گی۔

ملاقات میں تجارت، معیشت، سیاست، سیکیورٹی، امن کی صورت حال اور تعلیم سمیت مختلف امور پر بھی تبادلہ خیال کیا جائے گا۔

افغان صدر اشرف غنی لاہور بھی جائیں گے، جہاں وہ ایک اہم بزنس فورم میں شرکت کریں گے، فورم میں پاکستان اور افغانستان کے تاجر نمائندے شریک ہوں گے۔

افغان صدر اس سے قبل نومبر 2014ء اور دسمبر 2015ء میں پاکستان آ چکے ہیں، حال ہی میں صدر اشرف غنی اور وزیر اعظم عمران خان کے مابین ٹیلی فون پر بات ہوئی تھی۔

دونوں رہنماؤں نے مکہ مکرمہ میں ہونے والے او آئی سی سربراہ اجلاس کی سائیڈ لائنز پر بھی ملاقات کی تھی۔

حال ہی  میں پاکستان کی میزبانی میں بھوربن میں افغان امن کانفرنس کا انعقاد کیا گیا، جس میں افغانستان کی تمام بڑی سیاسی جماعتوں اور گروپوں کے رہنما اور نمائندوں نے شرکت کی۔