گرفتار شدہ اپوزیشن لیڈر شہبازشریف ہائی الرٹ کے ساتھ قومی اسمبلی پہنچنے پرخطاب

آج قومی اسمبلی کے نہایت ہی اہم   اور گرما گرم اجلاس میں مسلم  لیگ ن کے گرفتار اپوزیشن لیڈر شہباز شریف تقریر کریں گے۔

قومی اسمبلی میں قائد حزب اختلاف شہباز شریف اجلاس میں شرکت کے لیے اسپیکر کے پروڈکشن آرڈر پر قومی احتساب بیورو (نیب) کی حراست میں لاہور سے پارلیمنٹ ہاؤس پہنچ گئے۔، اس موقع پر تمام راستوں پر سیکورٹی ہائی الرٹ تھی۔

نیب ٹیم نے شہباز شریف کو قومی اسمبلی کے سارجنٹ ایٹ آرمز کے حوالے کیا اور قومی اسمبلی اجلاس کے بعد سارجنٹ ایٹ آرمز ہی شہباز شریف کو نیب ٹیم کے حوالے کریں گے۔ذرائع کے مطابق اسمبلی اجلاس میں شہباز شریف تقریر کریں گے ،جبکہ تمام ن لیگی ارکان بازوؤں پر سیاہ پٹیاں باندھ کر اجلاس میں شریک ہوں گے۔

ذرائع کا بتانا ہے کہ اجلاس کا وقت ختم ہونے کے بعد شہباز شریف نیب حکام کی اجازت کے بغیر کسی سے نہیں مل سکیں گے، اگر اسمبلی اجلاس ایک دن سے زیادہ طویل ہوا تو شہباز شریف کو نیب تھانے کی حوالات میں رکھا جائے گا۔

واضح رہے کہ مسلم لیگ ن کے صدر شہباز شریف آشیانہ ہاؤسنگ اسکینڈل کیس میں گرفتار ہیں اور جسمانی ریمانڈ پر نیب کی حراست میں ہیں۔

دریں اثنا ء پاکستان پیپلزپارٹی (پی پی پی) کے رہنما اور سابق قائد حزب اختلاف خورشید شاہ نے بھی شہباز شریف سے ان کے چیمبر میں ملاقات کی ہے۔