کراچی ، نا معلوم افراد کی فائرنگ ، ڈی ایس پی اوران کا ڈرائیو ر ہلاک

کراچی کے علاقے عزیزآباد مکا چوک پرنا معلوم افراد کی فائرنگ سے ڈی ایس پی ٹریفک اوران کا ڈرائیو ر ہلاک  ہوگیا ہے ۔

کراچی کے علاقے عزیز آباد کے قریب مکا چوک پرموٹر سائیکل پرسوارنامعلوم افراد نے ڈی ایس پی ٹریفک کریم آباد محمد حنیف کی موبائل پرفائرنگ کی جس کے نتیجے میں ڈی ایس پی ٹریفک موقع پرہی جاں بحق جب کہ ڈرائیورسلطان زخمی ہوگیا۔

واقعے کے فوری بعد امدادی ٹیمیں جائے وقوعہ پہنچیں اورزخمی ڈرائیورسلطان کو اسپتال منتقل کیا جہاں زخموں کی تاب نہ لاتے ہوئے ڈرائیور بھی جان کی بازی ہار گیا۔

پولیس کا کہنا ہے کہ ملزمان کی جانب سے پولیس وین پر دوطرف سے فائرنگ کی گئی، جائے وقوعہ سے ملنے والئے خول فارنزک لیب بھیج دیئے گئے ہیں جب کہ کاروائی کا آغازکردیا گیا ہے۔

دریں اثناء وزیرداخلہ سندھ سہیل انورسیال نے کراچی میں ٹریفک پولیس اہلکاروں کی ٹارگٹ کلنگ پرنوٹس لیتے ہوئے ایڈیشنل آئی جی کراچی سے واقعے کی فوری رپورٹ طلب کرتے ہوئے سیکیورٹی ہائی الرٹ رکھنے اوردہشتگردوں کی فوری گرفتاری کا حکم بھی دے دیا۔

واضح رہے کہ چند روز قبل کراچی میں ابوالحسن اصفہانی روڈ پرفائرنگ سے ایک ٹریفک پولیس اہلکارشہید جب کہ دوسرا شدید زخمی ہوگیا تھا۔