پاک افغان سرحد کو دوبارہ غیر معینہ مدت کیلئے بند کر دیا گیا

پاکستان اور افغانستان کے درمیان دو مرکزی سرحدی گزر گاہیں دو روز تک کھلی رکھنے کے بعد دوبارہ بند کر دی گئی ہیں۔

دو روز کے دوران چوبیس ہزار سے زائد افراد افغانستان گئے ۔ پاکستان کا جذبہ خیرسگالی ، افغان سرحد پر موجود ہزاروں افراد کی مشکلات کے پیش نظر حکومت پاکستان نے اٹھارہ روز بندش کے بعد سرحد دو روز کے لیے کھولی تھی ۔

سرحد پر صرف پاسپورٹ رکھنے والوں کو آمد و رفت کی اجازت دی گئی تھی تاہم تجارتی سرگرمیاں بدستور معطل ہیں ۔ دو روز مکمل ہونے کے بعد پاک افغان سرحد کو تاحکم ثانی بند کر دیا گیا ۔

دونوں ہمسایہ ملکوں کے مابین سرحد گزشتہ ماہ پاکستان میں ہونے والے ان متعدد دہشت گردانہ حملوں کے بعد بند کر دی گئی تھی، جن میں ایک سو پچیس سے زائد افراد مارے گئے تھے۔ پاکستان اور افغانستان کے مابین تجارت بھی زیادہ تر انہی دو سرحدی راستوں سے ہوتی ہے۔