سپریم کورٹ میں پاناما لیکس کیس کی سماعت جاری

سپریم کورٹ آف پاکستان میں پاناما لیکس کے معاملے پر وزیراعظم نواز شریف کے خلاف دائر درخواستوں پر سماعت جاری ہے۔

چیف جسٹس انور ظہیر جمالی کی سربراہی میں سپریم کورٹ کا 5 رکنی لارجر بینچ درخواستوں پر سماعت کر رہا ہے۔

دوران سماعت پاکستان تحریک انصاف (پی ٹی آئی) کے وکیل حامد خان نے وزیراعظم نواز شریف کے رواں برس 5 اپریل کو قومی اسمبلی سے کیے گئے خطاب کا متن پڑھ کر سنایا ۔

پاکستان تحریک انصاف ، جماعت اسلامی ، عوامی مسلم لیگ سمیت دیگر فریقین نے وزیر اعظم ، انکے بچوں اور خاندان کے دیگر افراد کے خلاف درخواستیں دائر کر رکھی ہیں جن میں موقف اختیا رکیا گیا ہے کہ وزیر اعظم نواز شریف نے منی لانڈرنگ اور دیگر غیر قانونی طریقے اختیار کر کے پاکستان سے پیسہ بیرون ممالک بھیجا جن سے انکے صاحبزادوں نے فلیٹس اور دیگر جائیدادیں بنائیں اور ان اثاثوں کا ذکر انہوں نے کہیں نہیں کیا اور نہ ہی اس پیسے پر انکم ٹیکس ادا کیا گیا ۔

سپریم کورٹ نے گزشتہ سماعت کے دوران وزیر اعظم  کے بچوں حسن اور حسین نواز کو جواب جمع کرانے کی ہدایت کرتے ہوئے سماعت دو روز کیلئے ملتوی کر دی تھی۔
دوسری جانب وزیر اعظم کے صاحبزادے حسن اور حسین نواز جبکہ صاحبزادی مریم نواز نے سپریم کورٹ میں درخواست دائر کر کے اپنا وکیل تبدیل کر لیا ہے اور اب سلمان بٹ کی جگہ اکرم شیخ انکا کیس لڑیں گے ۔