ایم کیو ایم کی رابطہ کمیٹی سے فضل الرحمان کی ملاقات
متحدہ قومی موومنٹ کے ممبران اسمبلی کےاستعفے پیش کرنے کے بعد پیدا ہونے والے سیاسی بحران کے حل کی کوششیں جاری ہیں
متحدہ قومی موومنٹ کے استعفوں کے معاملے پر جمعیت علمائے اسلام کے سربراہ مولانا فضل الرحمن نے کراچی آتے ہوئے اس پارٹی کی رابطہ کمیٹی سے ملاقات کی۔
ایم کیو ایم کے مرکز نائن زیرو پر ڈاکٹر فاروق ستار نے کہا کہ مولانا فضل الرحمان کا نائن زیرو کاپہلا دورہ ہے ، وہ ثالث کے طور پرنائن زیروآئے، انہوں نے ہمیں یہاں آکر ہمیں منایا ہے اور کہا ہے کہ ایم کیو ایم پارلیمان میں رہتے ہوئے مسائل حل کرے۔
الطاف حسین اور ہم نے مولانا فضل الرحمان پر اعتماد کیا ہے، مذاکرات جاری تھے کہ رشید گوڈیل پر حملے کی خبر آئی، رشید گوڈیل پرحملہ بزدلانہ کارروائی اور مذاکرات کوسبوتاژ کرنے کی کوشش ہوسکتی ہے۔
مولانا فضل الرحمٰن نے اس موقع پر بتایا کہ استعفوں سے پیدا ہونے والی بحرانی کیفیت کو حل کیا جاسکتا ہے، کوشش ہے اس بحران سے نکلنے میں کامیاب ہوجائیں۔
اپنے مینڈیٹ کے حوالے سے انہوں نے بتایا کہ وزیراعظم اور اپوزیشن لیڈر کا مینڈیٹ لے کر نائن زیرو آیا ہوں۔
ایم کیو ایم کے پارلیمانی لیڈر فاروق ستار نے صحافیوں کو بتایا کہ کراچی آپریشن کی کبھی مخالفت نہیں کی البتہ کارروائی غیر جانبدارانہ ہونی چاہیے۔