سابق صدر ذرداری مزید دو مقدمات سے بری

ذرائع کے مطابق پاکستان کی احتساب عدالت نے سابق صدرِ پاکستان آصف علی زرداری کو دو مقدمات میں بری کر دیا ہے۔یہ مقدمات اے آر وائی گولڈ اور اُسس ٹریکٹر سے متعلق تھے۔
احتساب عدالت کے جج محمد بشیر نے اے آر وائی گولڈ اور ارسُس ٹریکٹر ریفرنس کی سماعت کی تو آصف علی زرداری کے وکیل فاروق ایچ نائیک نے کہا کہ ان مقدمات میں مرکزی ملزمان بری ہو چکے ہیں لیکن اُن کے موکل کے خلاف ابھی تک مقدمہ چلایا جا رہا ہے، جو کہ خلاف قانون ہے۔
اُنھوں نے کہا کہ آصف علی زرداری ان مقدمات کی پیروی کے لیے اس لیے حاضر نہیں ہو سکے کیونکہ اُنھیں صدارتی استثنیٰ حاصل تھا۔
احتساب عدالت کے جج نے کہا کہ جب کسی مقدمے کے مرکزی ملزمان کے خلاف مقدمات ختم ہو جائیں تو شریک ملزمان کے خلاف کارروائی جاری نہیں رکھی جا سکتی۔
اے آر وائی گولڈ ریفرنس میں آصف علی زرداری پر سونا درآمد کرنے میں کمیشن لینے اور زرعی ترقیاتی بینک کے ساتھ روس سے منگوائے گئےارسُس ٹریکٹروں میں کمیشن لینے کے الزامات تھے۔
اُن پر الزام عائد کیا گیا تھا کہ اُنھوں نے فی ٹریکٹر ڈیڑھ لاکھ روپے کمیشن لیا تھا، تاہم قومی احتساب بیورو ان مقدمات میں ثبوت فراہم کرنے میں ناکام رہا ہے۔
واضح رہے کہ اس سے پہلے احتساب عدالت آصف علی زرداری کو پولو گراونڈ ریفرنس میں بری کر چکی ہے۔