عید کےموقع پر بھارتی فورسز کی فائرنگ

وزیراعظم کے قومی سلامتی اور خارجہ امور کے مشیر سرتاج عزیز نے بھارتی سیکورٹی فورسز کی طرف سے ورکنگ بانڈری اور لائن آف کنٹرول پر جنگ بندی کی خلاف ورزیوں کے حالیہ واقعات پر گہری تشویش کا اظہار کرتے ہوئے کہاکہ بھارتی سیکورٹی فورسزسات دن سے اور عیدالضحی کے تقدس کو بالائے طاق رکھ کر لائن آف کنٹرول اور ورکنگ بانڈری پر فائرنگ اور گولہ باری کر رہی ہیں جس کے نتیجے میں چار معصوم شہری شہید ہوگئے ہیں ۔ انہوں نے کہاکہ بھارتی حکومت پاکستان کی طرف سے سفارتی سطح پر بھرپور احتجاج کے باوجود اپنی فورسز کو باز نہیں رکھ سکی۔ بھارت کو فوری طور پر فائرنگ اور گولہ باری کو روکنے کی اور امن برقرار رکھنے میں تعاون کرنےضرورت ہے۔
دریں اثناء وفاقی وزیر برائے امور کشمیر و گلگت بلتستان چوہدری محمد برجیس طاہر نے بھی بھارت کی جانب سے لائن آف کنٹرول پر بلا اشتعال فائرنگ کی پر زور مذمت کرتے ہوئے معصوم قیمتی انسانی جانوں کے ضیاع پر گہرے رنج و الم کا اظہار کیا۔ انھوں نے کہا کہ پاکستان اور بھارت کے ما بین تعلقات میں سب سے بڑی رکاوٹ بھارت کا رویہ ہے۔ بھارت نہتے کشمیریوں پر مظالم برسا نے کیساتھ ساتھ کنٹرول لائن اور ورکنگ باونڈری پر بلا اشتعال فائرنگ کا سلسلہ جاری رکھا ہوا ہے۔ انہوں نے کہاکہ پاکستان نے جب بھی بھارت کی جانب دوستی کا ہاتھ بڑھایا تو بھارت نے جواب میں لاشیں دیں۔ پاکستان بھارت کی جانب سے اس غیر انسانی رویے پر خاموش نہیں بیٹھے گاوہ ان بے گناہ شہریوں کی ہلاکت کا معاملہ عالمی سطح پر اٹھائے گا۔