آپریشن ضربِ عضب میں کا میابیوں کا سلسلہ جاری
پاک فوج نے ابتک کی کاروائیوں میں 500 کے قریب دہشت گردوں کو ہلاک اور ان کے درجنوں ٹھکانے تباہ کر دیے ہیں
71199
اطلاع کے مطابق پاک فوج کی شمالی وزیرستان میں آپریشن ضرب عضب کی کامیابیوں کا سلسلہ جاری ہے۔ حال ہی میں سیکیورٹی فورسز نے تحصیل میر علی کے مختلف علاقوں میں کارروائی کرتے ہوئے 9 دہشت گردوں کو ہلاک کر دینے سمیت ان کے 7 ٹھکانے تباہ کر دیے ہیں۔ دوسری جانب حفاظتی دستوں کی خوشحال اور حسوخیل کی جانب پیش قدمی جاری ہے۔
واضح رہے کہ پاک فوج کے گزشتہ ماہ دہشت گردوں کے خلاف شروع کئے جانے والے آپریشنز میں اب تک 500 کے لگ بھگ شدت پسند ہلاک اور ان کے سینکڑوں ٹھکانے تباہ کئے جا چکے ہیں۔ مزید برآں دورانِ آپریشن ضرب عضب بڑی تعداد میں اسلحہ اور آئی ای ڈیز بنانے کی متعدد فیکٹریاں بھی پکڑی جا چکی ہیں۔
