اسرائیلی جارحانہ حملوں میں اموات کی تعداد ساڑھے 4 ہزار کے قریب پہنچ گئی
اب تک 4 ہزار 385 افراد ہلاک ہو چکے ہیں جو کہ2014 میں50 روزہ جنگ میں مرنے والے 2 ہزار 251 فلسطینیوں سے 84 فیصد زیادہ ہے۔
اسرائیل کے غزہ پر حملوں میں ابتک 1756 بچوں سمیت 4 ہزار 385 شہری ہلاک اور 13 ہزار سے زائد زخمی ہو ئے ہیں۔
غزہ کے مختلف علاقوں میں اسرائیلی فوج کے تازہ حملوں میں کم از کم 30 فلسطینی اپنی جانوں سے ہاتھ دھو بیٹھے۔
اسرائیلی فوج نے رات بھر غزہ کے مختلف مقامات پر فضائی حملے کیے۔
فلسطینی خبر رساں ایجنسی وفا کی مقامی ذرائع کے حوالے سے خبر کے مطابق رفح کے الا سلام ضلع میں 3 منزلہ عمارت پر حملے میں 2 افراد ہلاک اور زاریب علاقے کی 2 منزلہ عمارت پر حملے میں 3 بچوں سمیت 5 افراد جاں بحق ہوئے۔
صیامت کے علاقے میں ایک گھر پر حملے میں ایک شخص زخمی ہوا۔
بتایا گیا ہے کہ ضلع سیلم میں ہونے والے حملے میں 7 افراد لاپتہ ہیں۔
جیبالیہ کے مشرق میں ایک گھر پر حملے میں کم از کم 14 افراد اپنی جانوں سے ہاتھ دھو بیٹھے۔
غزہ میں داخلی امور کی وزارت کی طرف سے ایک سابقہ تحریری بیان میں اعلان کیا گیا تھا کہ غزہ کے شمال، وسطی اور جنوب میں اسرائیل کی طرف سے کیے گئے حملوں میں 15 افراد ہلاک ہوئے۔
بتایا گیا ہے کہ اسرائیلی فورسز نے مقبوضہ مغربی کنارے کے مشرقی علاقے ایریحہ میں ایک فلسطینی کو گولی مار کر شہید کر دیا۔
فلسطینی خبر رساں ایجنسی وافا کے مطابق نصف شب اسرائیلی فورسز نے ایریحہ میں عقبہ جبر اور عین السلطان پناہ گزین کیمپوں پر دھاوا بولا اور عقبہ جبر میں ایک مکان پر بم پھینکا۔
ایریحہ کے جنوب میں القدس اسٹریٹ پر اسرائیلی فورسز اور فلسطینیوں کے درمیان ہونے والی جھڑپ میں اسرائیلی فورسز کی فائرنگ کے نتیجے میں ایک بچہ جاں بحق ہوگیا۔
فلسطینی ہلال احمر نے اعلان کیا ہے کہ عقبہ جبر اور عین سلطان پناہ گزین کیمپوں میں جھڑپوں میں 6 فلسطینی زخمی اور 2 فلسطینیوں کو حراست میں لیا گیا ہے۔
اقوام متحدہ کے دفتر برائے رابطہ برائے انسانی امورنے "غزہ کی پٹی اور اسرائیل میں تنازعات" کے عنوان سے روزانہ ایک رپورٹ جاری کی۔
رپورٹ میں واضح کیا گیا ہے غزہ کی وزارت صحت کے مطابق 7 اکتوبر سے شروع ہونے والے تنازعے کے بعد سے اب تک 4 ہزار 385 افراد ہلاک ہو چکے ہیں اور یہ تعداد2014 میں50 روزہ جنگ میں مرنے والے 2 ہزار 251 فلسطینیوں سے 84 فیصد زیادہ ہے۔
رپورٹ میں بتایا گیا ہے کہ غزہ میں 30 فیصد مکانات تباہ یا ناقابل رہائش ہوگئے ہیں، 18 اکتوبر تک 12 ہزار 845 مکانات تباہ ہوئے، 9 ہزار 55 مکانات ناقابل رہائش ہوگئے اور ایک لاکھ 21 ہزار مکانات کو معمولی نقصان پہنچا ہے۔
فلسطینی قیدیوں کی ایسوسی ایشن کے میڈیا نمائندے ایمانی سیرہائن نے بتایا کہ اسرائیلی فوجیوں نے آج رات مغربی کنارے اور بیت المقدس کے مختلف علاقوں میں چھاپوں کے دوران 100 سے زائد فلسطینیوں کو حراست میں لے لیا۔
