شام: مشرقی الغوطہ پر فضائی حملے،درجنوں ہلاک

شام کے جنگ زدہ علاقے مشرقی الغوطہ میں روس اور شامی فوج کے فضائی حملوں میں مخالف گروپ فیلق الرحمان کے دو کمانڈروں اور تین بچوں سمیت 37 افراد ہلاک ہوگئے ہیں۔

اطلاع  ملی ہے کہ روسی اور شامی لڑاکا طیاروں نے فیلق الرحمان کے زیر قبضہ علاقے پر تباہ کن بمباری کی ہے۔

ان میں ایک فضائی حملہ  گزشتہ منگل کی شب کیا گیا تھا اور یہ روس کے لڑاکا طیارے نے کیا تھاجس میں فیلق الرحمان کے دو کمانڈروں سمیت بارہ ارکان مارے گئے تھے۔

خبر کے مطابق گزشتہ روز روسی اور شامی فوج کے مشرقی الغوطہ کے اسی علاقے پر فضائی حملوں میں تین بچوں سمیت 25شہری جاں بحق ہوئے ہیں۔

فضائی بمباری میں مارے گئے فیلق الرحمان کے دونوں کمانڈروں کے نام ابو محمد سیف اور ابو محمد جوبر بتائے ہیں تاہم، یہ نہیں بتایا  گیا ہے کہ یہ فضائی حملے مشرقی الغوطہ میں واقع کس شہر اور قصبے پر کیے گئے ہیں۔

شامی فوج کے خلاف برسر پیکار فیلق الرحمان نے بھی اس حوالے سے کوئی بیان جاری نہیں کیا ہے۔