روس اور امریکہ کا شام میں جنگ بندی پر اتفاق

امریکی وزیر خارجہ جان کیری نے جنیوا میں اپنے روسی ہم منصب سرگی لاوروف سے ملاقات کے بعد کہا ہے کہ شام میں صدر بشار الاسد جنگ زدہ علاقے حلب میں فوجی کارروائی جاری رکھنے پر مُصر ہیں تاہم واشنگٹن نے ماسکو کے ساتھ مل کر جنگ بندی کا بنیادی فارمولہ طے کیا ہے جس کے چند نکات پر اتفاق رائے ابھی باقی ہے۔

خبر کے مطابق روسی ہم منصب کے ہمراہ جنیوا میں ایک مشترکہ پریس کانفرنس سے خطاب کرتے ہوئے جان کیری نے کہا کہ بشارالاسد حلب میں طاقت کے استعمال اور فوجی کارروائی جاری رکھنے پر قائم ہیں تاہم روس اور امریکہ  جنگ زدہ علاقے میں جنگ بندی کے ایک ابتدائی فارمولے کی تیاری پر متفق ہیں۔

 انہوں نے کہا کہ شام میں جنگ بندی کی بحالی اور امدادی سامان کی زیادہ بہتر رسائی کے اقدام پر زیادہ تر تکنیکی بات چیت مکمل ہو چکی ہے۔

اس موقع پر روسی وزیرخارجہ  لاوروف نے بھی اس بات کی تصدیق کہ کہ امریکہ ا اور روس دونوں حلب میں جنگ بندی کے  لائحہ عمل کے قریب پہنچ گئے ہیں تاہم ابھی معاہدے کو حتمی شکل دینا باقی ہے۔ کیونکہ تمام مسائل حل نہیں ہوئےہیں۔

امریکی وزیرخارجہ نے کہا کہ اقوام متحدہ کے شام کے لیے امن مندوب اسٹیفن دی میستورا شام کے متحارب فریقین کو لڑائی روکنے، بات چیت شروع کرنے اور سیاسی انتقال اقتدار پر قائل کرنے کے لیے کوششیں جاری رکھیں گے۔