عراق میں گرین زون کو عوام کے لیے کھول دیا گیا ہے

عراق میں گرین زون کو عوام کے لیے کھول دیا گیا ہے۔
عراق میں 12 سال بعد بغداد کے سب سے قلعہ بند علاقے جسے گرین زون بھی کہا جاتا ہے کو عام عوام کے لیے کھول دیا گیا ہے۔
عراق کے وزیراعظم حیدر العابدی نے گرین زون کو کھولنے کی تقریب میں حصہ لیا۔انہوں نے اس موقع پر خطاب کرتے ہوئے کہا کہ انھوں نے عوام سے جووعدہ کیاتھا اسے پورا کر دکھایا ہے۔
ان کا مزید کہنا تھا کہ کچھ پابندیاں اب بھی قائم رہیں گی جن میں کئی علاقے یا سڑکیں ایسی ہیں جہاں جانے کے لیے خصوصی اجازت نامے کی ضرورت ہوگی۔
گرین زون دس کلومیٹر کا وہ علاقہ ہے جہاں سرکاری عمارتیں اور سفارت خانے واقع ہیں۔ اس علاقے کو سنہ 2003 میں امریکہ کی جانب سے کیے جانے والےحملوں کے بعد سکیورٹی اقدامات کے پیشِ نظر عام شہریوں کے لیے بند کر دیاگیا تھا۔
گرین زون دریائے دجلہ کے مغربی کنارے پر واقع ہے جسے 2003 میں عوام کے لیے ممنوعہ علاقہ قراردے دیا گیا تھا۔