یہودی آباد کاروں کے مسجد اقصیٰ پر دھاوے ناقابل قبول ہیں

حکومت اردن نے یہودی آباد کاروں کی جانب سے مسجد اقصی پر روز مرہ کی بنیاد پر دھاووں کو غیرقانونی قرار دیتے ہوئے فلسطینی نمازیوں کی مسجد میں داخلے پرپابندیوں کی شدید مذمت کی ہے ۔
حکومت کے ترجمان اور وزیر مملکت برائے ریاستی امور ڈاکٹر محمد المومنی نے عمان میں پریس کانفرنس سے خطاب کرتے ہوئے کہا کہ صہیونی ریاست کے سیکیورٹی اداروں، پولیس اور فوج کے ہاتھوں فلسطینی شہریوں کو قبلہ اول میں عبادت سے روکنا ناقابل برداشت ہے ۔ مسجد اقصیٰ میں فلسطینی نمازیوں کے داخلے پرعائد پابندیوں کی جتنی مذمت کی جائے کم ہے ۔ اردن اسرائیل کی دوغلی پالیسی کو کسی صورت میں قابل قبول نہیں سمجھتا، یہودیوں کو قبلہ اول میں داخلے کی کھلی چھٹی دینا اور فلسطینی نمازیوں کو روکنا عالمی قوانین کی خلاف ورزی ہے ۔ انھوں نے کہا کہ عمان وزارت مذہبی امور واوقاف نے بیت المقدس میں موجود مقدس مقامات کے تحفظ کیلئے 52 نئے محافظ بھرتی کئے ہیں جب کہ آئندہ چند ماہ میں مزید 70 محافظ بیت المقدس بھیجے جائینگے ۔محمد المومنی نے صہیونی ریاست سے مطالبہ کیا کہ وہ مسلمانوں کے پہلے قبلہ اور عالم اسلام کے تیسرے مقدس ترین مقام کی بے حرمتی سے باز رہے ورنہ اس کے سنگین نتائج برآمد ہوسکتے ہیں۔ یہودی آباد کاروں کا قبلہ اول میں داخل ہونا اور اسرائیلی پولیس کی جانب سے فلسطینی نمازیوں کو روکنا آگ سے کھیلنے کے مترادف ہے ۔ ادھر حماس نے اسرائیلی حکام کی جانب سے مسجد اقصیٰ کے محافظوں پر تشدداورنمازیوں کو قبلہ اول میں داخلے سے روکنے کی کاروائیوں کی شدید مذمت کی ہے ۔ حماس نے فلسطینی عوام سے پرزور اپیل کی کہ وہ صہیونی دشمن کی جانب سے قبلہ اول میں داخلے پرپابندی کی سازشوں کو ناکام بنا دیں، فلسطین کا بچہ، بوڑھا، جواں، مرد اور عورت سب قبلہ اول کے محافظ ہیں۔ انہوں نے کہا کہ اسرائیل کی تمام ترسازشوں کے باوجود فلسطینی عوام مسجد اقصیٰ کو تنہاء نہیں چھوڑ سکتے ۔