ثانیہ مرزا ٹینس عالمی درجہ بندی میں پہلے نمبر پر

ثانیہ مرزا نے ٹینس میں خواتین کے ڈبلز مقابلوں میں عالمی درجہ بندی میں پہلے نمبر پر پہنچنے والی پہلی بھارتی کھلاڑی کا اعزاز حاصل کر لیا ہے۔
انھوں نے یہ اعزاز امریکی ریاست جنوبی کیرولائنا کے شہر چارلسٹن میں منعقدہ فیملی سرکل کپ کے فائنل میں فتح کے بعد حاصل کیا۔
اتوار کو کھیلے جانے والے فائنل میں ثانیہ نے سوئٹزرلینڈ کی مارٹینا ہنگس کے ساتھ مل کر کیسی ڈیلاکوا اور داریجا جوارک کی جوڑی کو یکطرفہ مقابلے کے بعد چھ صفر اور چھ چار کے سکور سے شکست دی۔
یہ ڈبلز مقابلوں میں ثانیہ کے کریئر کا 26واں ٹائٹل ہے اور ثانیہ اور مارٹینا کی جوڑی اس ٹورنامنٹ میں ٹاپ سیڈ تھی۔
یہ دونوں کھلاڑی اب تک ایک ساتھ تین ٹورنامنٹس میں میدان میں اتری ہیں جن میں سے دو میں یہ فاتح رہی ہیں۔