یہ نفرت نہیں امریکہ سے محبت کا اظہار ہے:پورٹ لینڈ حملہ آور کا بیان

امریکی ریاست اوریگن میں مسلمان خواتین کو دھمکانے پر دخل اندازی کرنے والے دو افراد کو چاقو کے وار سے قتل کرنے والے ملزم کو عدالت میں پیش کیا گیا۔

35 سالہ جیریمی جوزف کے خلاف قتل، اقدام قتل، ڈرانے دھمکانے اور ہتھیار رکھنے کے الزامات عائد کیے گئے ہیں۔ جیریمی جوزف کرسٹیئن پہلے سے ایک سزا یافتہ مجرم ہے۔

اپنی مختصر پیشی میں جیریمی جوزف نے نعرے بازی کی اور کہا کہ آپ اسے دہشت گردی نہیں کہیں گے بلکہ یہ حب الوطنی ہے۔

جیریمی جوزف نے خود پر عائد الزامات کے خلاف کوئی درخواست نہیں دی اور اب انھیں سات جون کو دوبارہ عدالت میں پیش کیا جائے گا۔

 صدر ڈونلڈ ٹرمپ نے ایک ٹویٹ میں اس حملے کو ناقابلِ قبول عمل قرار دیا تھا۔

یاد رہے کہ  حملے میں ہلاک ہونے والوں میں سے ایک 23 سالہ ٹالیسن مائرڈن نامکائی میشے تھے جبکہ دوسرے 53 سالہ رکی جان بیسٹ تھے۔ وہ چار بچوں کے والد اور سابق فوجی تھے۔