امریکہ جانا یا پھر چاند کو، کونسا زیادہ آسان ہو گا؟

امریکی صدر ڈونلڈ ٹرمپ نے ایک نئے  حکم نامے پر دستخط کرتے ہوئے 7 مسلم ملکوں سے آنے والے پناہ گزینوں کے امریکہ  میں داخلے پر مکمل طور پر  پابندی عائد کردی ہے۔

یاد رہے کہ ٹرمپ  نے اپنی انتخابی مہم کے دوران ہی بار ہا کہا تھا کہ اگر وہ صدرمنتخب ہو گئے  تو دہشت گردی کے شکار ملکوں سے آنے والے لوگوں  کے امریکہ  میں داخلے پر پابندی عائد کردیں گے اور اب  اس صدارتی حکم کے ساتھ انہوں نے اپنے وعدے کو حقیقت کا روپ دے دیا ہے۔

وائٹ ہاؤس ترجمان کے مطابق ’’قومی تحفظ کےلئے غیرملکی دہشت گردوں کے امریکہ  میں داخلے پر پابندی‘‘ کے عنوان سے جاری کردہ اس خصوصی صدارتی حکم نامے کے تحت شام، ایران، عراق، سوڈان، لیبیا، یمن اور صومالیہ کے شہریوں کو آئندہ 90 دن تک امریکا میں داخل ہونے نہیں دیا جائے گا، علاوہ ازیں   امریکہ  میں تارکین وطن کے داخلے کے پروگرام کو 120دنوں  کے لیے معطل کردیا گیا۔

ڈونلڈ ٹرمپ کا کہنا تھا کہ پوری فہرست کی معلومات دو گھنٹوں میں سامنے آجائے گی جسے سن کر آپ کو بڑی حیرت ہوگی۔

انہوں نے یہ بھی بتایا  کہ ان کا دیہان ان افراد کی جانب ہے جو بری نیت سے امریکا میں داخل ہوتے ہیں، جن کا تعلق داعش سے ہے اور وہ جھوٹی شناخت سے یہاں آرہے ہیں۔

ٹرمپ کا منصوبہ 2017 کے مالی سال میں امریکا آنے والے شامی پناہ گزینوں کی تعداد کم کرکے پچاس ہزار تک کرنا ہے جو مالی سال 2016 میں ایک لاکھ دس ہزار تھی۔ ڈونلڈ ٹرمپ نے فخریہ انداز میں اعلان کیا کہ وہ ’’انتہاء پسند اسلامی دہشت گردوں‘‘ کو امریکا سے باہر رکھنے کےلئے جانچ پڑتال کے سخت ترین اقدامات ترتیب دے رہے ہیں۔