فرانس اور بلجیم میں دہشت گردوں کے خلاف چھاپے

ایک سو بتیس افراد کی ہلاکت کا سبب بننے والے پیرس کے دہشت گردی کے کے حملوں کے بعد دہشت گردوں کے خلاف بڑے پیمانے پر کاروائی کا آغاز کردیا گیا ہے۔
فرانس میں حکام کا کہنا ہے کہ فرانس کے مختلف علاقوں میں مشتبہ اسلامی شدت پسند جنگجوؤں کے خلاف سلسلہ وار چھاپوں کے دوران 23 افراد کوگرفتار کیا گیا ہے جبکہ درجنوں ہتھیار بھی قبضے میں لیےگئے ہیں۔
ان چھاپوں کا سلسلہ پیرس میں ریستوران، شراب خانوں، کنسرٹ ہال اور ایک سٹیڈیم پر ہونے والے مختلف حملوں کے بعد شروع کیا گیا ہے۔ جمعے کو ہونے والے ان حملوں کے نتیجے میں 132 افراد ہلاک ہو گئے تھے۔
اس کے علاوہ بیلجیئم کے شہر برسلز میں بھی پولیس آپریشن جاری ہے۔ شہر کے ایک علاقے میں گولیاں چلنے اور دھماکوں کی آوازیں سنی گئی ہیں۔
اس سے قبل فرانس نے اعلان کیا تھا کہ پیرس میں حملے میں سے دو خودکش حملہ آوروں احمد المحمد اور سامی عمیمور کو شناخت کر لیا گیا ہے۔
المحمد نے فرانس سٹیڈیئم میں خود کو دھماکے سے اڑا لیا تھا۔ استغاثہ کا کہنا ہے کہ اگر ان کی لاش کے نزدیک پایا جانے والا پاسپورٹ اصلی ہے تو اس صورت میں وہ دس ستمبر 1990 کو شام کے شہر ادلب میں پیدا ہوئے تھے۔
بلجیم میں حراست میں لیے جانے والے افراد کی تعداد 10 تک پہنچ گئی اور مزید گرفتاریوں کا سلسلہ جاری ہے۔