Türkiye Ysraýylyň Premýer ministrine reaksiýa bildirdi

Türkiyäniň Daşary işler ministrligi: "Ysraýylyň Premýer ministri Binýamin Netanýahunyň we Daşary işler ministri Eli Koheniň Prezident Rejep Taýýip Erdogan baradaky esassyz töhmetleri" bilen baglanşykly ýazmaça beýannama berdi. 

Beýannamada Palestinanyň halkyna garşy amala aşyrýan zulumlar we gyrgynçylyklar bilen taryhyň gara sanawyna giren ysraýylly resmileriň hukukdan söz etmäge haklarynyň bolmandygy beýan edildi. 

"Hakykatlaryň aýdylmagyndan biynjalyk bolýan Binýamin Netanýahunyň we Eli Koheniň Hormatly Prezidentimiz baradaky esassyz töhmetleri, öz eden-etmişleriniň üstüni örtüp bilmez" diýip aýdylýan beýannamada: "Kanunylygyny adamzat wyždanynda ozaldan ýitiren ysraýylly resmiler, bütin dünýäniň gözüniň öňünde hassahanalary bombalap, zenanlary we çagalary öldürip edýän jenaýatlarynyň üstüni örtüp bilmezler we ünsleri başga tarapa sowup bilmezler" diýip aýan edildi. 

Beýannamada: "Dünýä jemgyýetçiliginde çuňňur gahar-gazap oýandyran bu adamzat jenaýatlarynyň öjükdirijileri we günäkärler ir ýa-da giýç kazyýetiň öňüne çykarlar. Türkiye Gazadaky gyrgynçylyga garşy durmaga we Palestinanyň halkynyň hakly dawasyny goldamaga dowam eder" diýip habar berildi.