Qazaqstan ilbaşınıñ Pol'şa häm Serbiyägä räsmi säfäre

Qazaqstan ilbaşı Nazarbayev 22-25 avgust könnärendä Pol'şa häm Serbiyägä räsmi säfär yasadı. Nazarbayevnıñ älege Könçığış Awrupa illärenä säyäxätendä 100 dän kübräk êşmäkär qatnaştı. 

Qazaqstan ilbaşı başta Polşağa kitte. Polşa säyäxäte qısasında ilbaşı Andjey Duda belän üzara häm wäkilleklär arası söyläşülär ütkärde. Söyläşülärdän soñ urtaq matbuğat oçraşuı uzdı.

İlbaşı Nazarbayev matbuğat oçraşuında ike ilneñ urtaq tarixqa iyä buluın belderep Polşanıñ Qazaqstannıñ Awrupadağı iñ yaqın häm möhim partnerı buluın citkerde. Nursoltan Nazarbayev kiläse yılğa qadär ike yaqlı vizasız säyäxät sistemasın ğamälgä kertüne planlaştıruların ,ike il arasında turıdan – turı oçışlar başlanacağın belderde. Qazaqstan ilbaşı ike il tranzit  transport potenŝialın qullanunıñ ähämiyätenä basım yasap, Polşa häm Rusiya belän öç yaqlı kileşü buldıru häm Kavkaz tranzit koridorın qullanunı täqdim itte.

Nazarbayev Polşa säfäre qısasında premyer-ministr häm parlament başlığı belän dä ayırım-ayırım küreşep söyläşte. Qazaqstan ilbaşı Polşa senatınıñ maxsus däftären dä imzaladı.

Qazaqstan ilbaşı Nazarbayev säfäreneñ ikençe könendä Varşavada Polşa-Qazaqstan Êş forumında qatnaştı. Yaqınça 400 êşmäkär qatnaşında uzğan forumda çığış yasawçı Nazarbayev ike il arasındağı säwdä külämeneñ 2015 nçe yılda 1 milliard 100 million dollar buluın häm monıñ potenŝialdan bik tübän buluın belderde. Xäzerge waqıtta Qazaqstanda 100 dän kübräk Polşa şirkäte êşçänlek başqara.

Pol'şa säfärennän soñ Nazarbayev Serbiyägä kitte.Qazaqstan ilbaşın Belgrad hawa mäydanında xezmättäşe Tomislav Nikoliç tantanalı räweştä qarşı aldı. Üzara häm wäkilleklär arası söyläşülärdä ike il arasında awıl xucalığı, sänäğät, tözeleş,mediŝina häm daru sänäğätendä xezmättäşlek häm ike yaqlı kapital salu mäs’älälärendä kileşü täêmin itelde. İke il arasında 5 ayırım tarmaqta xezmättäşlek protokolı imzalandı. Nazarbayev Serbiya ilbaşına Qazaqstan duslıq ordenın tapşırdı.

Serbiya sarayındağı oçraşudan soñ liderlar urtaq matbuğat oçraşuı ütkärde. Biredä çığış yasawçı Nazarbayev ike il arasındağı säwdä häm iqtisadi xezmättäşlekneñ töp potenŝialnı çağıdırmawın belderde.

Serbiya ilbaşı Nikoliç ta ilenä berençe tapqır kilgän Qazaqstan ilbaşı Nazarbayevnıñ säfären tarixi dip bäyäläp ike ilneñ urtaq iqtisadi maqsatları buluına basım yasadı.

Nursoltan Nazarbayev Serbiya säfäre qısasında premyer-ministr Aleksandar Vucic häm patriarx İriney belän küreşep söyläşte. Patriarx İriney Nazarbayevqa Serbiya pravoslaviye çirkäweneñ duslıq ordenın tapşırdı. Nazarbayev Serbiya ilbaşı belän Belgradta qazaq şağire Jambul Jambayev häykäleneñ açılışın yasadı.

Qazaqstan tışqı politika säyäsäten bik osta räweştä alıp bara. Qazaqstan cähätennän Awrupa illäre iñ möhim säwdä partnerları. Nazarbayevnıñ Polşa häm Serbiya säfäre bu bäyläneştä zur ähämiyätkä iyä.

Qazaqlar belän polyaklarnıñ mönäsäbätläre Berençe bötendönya suğışına qadär barıp totaşa. Berençe häm ikençe Bötendönya suğışlarında Qazaqstan cirlärenä meñnärçä polyak sörgengä cibärelä. Xäzerge waqıtta Qazaqstanda 40 meñnän kübräk polyak yäşi. Bu bäyläneştä Qazaqstan – Polşa mönäsäbätläreneñ tağın da kamilläşäçägen äytergä kiräk.

Serbiya däwlät başlığı uzğan yıl Qazaqstanğa säfär yasağan ide. Nazarbayevnıñ Serbiyägä yasağan berençe säfäre moña cawap räweşendä buldı. Serbiya da Qazaqstanda tulı wäqalätle ilçelek açıp mönäsäbätlärne yuğarı däräcädä totarğa teli. Çönki Qazaqstan Kosovo mäs’äläsendä Serbiyanıñ cir bötenlegen yaqlıy häm bu ike il xalıqara arenada ber-berseneñ iniŝiativalarına yaqlaw kürsätä.

Qazaqstan ilbaşı Nursoltan Nazarbayev çit il säfärlärendä xezmättäşlären EXPO 2017 gä çaqırırğa, monıñ belän bäyle kileşülär täêmin itärgä dä onıtmıy. Polşa häm Serbiya säfärlärendä dä Nazarbayev bu illärne EXPO 2017 dä qatnaşırğa çaqırdı häm alar monı qabul itte. Xalıqara arenada  xörmät itelgän Nursoltan Nazarbayev säyäsättäge ostalığın Awraziya iqtisadi Berlege häm Awrupa Berlege arasında yıl azağında Bryusseldä ütkäreläçäk konferenŝiyädä dä kürsäter dip ışanıp qalabız.