İzrailneñ Livanğa höcüm kodları

İzrail böten Livannı şok xälenä kertkän zur terrorçı höcüme oyıştırdı. Ber mizgeldä Bäyrutta häm başqa şähärlärdä meñnärçä peydjer häm raśiya bomba şikelle şartladı. Kübräk “Xizbuılla” äğ’zaları qullanğan êlemtä sistemaları aşa yasalğan bu höcümnän soñ 32 keşeneñ ğomere özelde, 3 meñnän artığı cäräxätlände. İzrail küzläw oyışmalarınıñ täêminat çılbırına ütep êlemtä cihazlarınıñ êçenä şartlatqıç quyuı häm maxsus signal cibärep alarnı ber ük waqıtta şartlatuı uylanıla.  

7nçe oktyabr’dä Ğazzädä başlanğan suğışnıñ başınnan birle İzrail belän “Xizbulla” arasında kontrol’dä totıluçı xärbi qatışular bulğalap tordı. Qayçaq yaqlar çiklärne uzuçı adımnar yasasa da, tulı külämle suğışqa iltüçe xäräkätlärdän tayçındılar. Tik İzrailneñ “Xizbulla”nıñ ähämiyätle citäkçelärennän berse Fuat Şükürgä höcümennän soñ balanslar üzgärde. Bigräk tä, “Xizbulla”nıñ älege üterügä nıqlap torıp cawap birmäwe İzrailgä qıyulıq östäde. Näticädä, böten Livannı teträtkän adım yasaldı.

17nçe sentyabr’ sişämbe könne töşke säğat’lärdä Livanda ber’yulı meñnärçä şartlaw buldı. 12 keşe ülde, kimendä 2800e yaralandı. 18endä qabat şartlawlar - bu yulı raśiya. 20 üle, 450 yaralı. Zur panika häm çualçıqlıq barlıqqa kitergän bu terrorçı höcümnäreneñ sere tiz arada çişelde häm cawaplınıñ İzrail buluı açıqlandı.

Bu - “8200” dip ataluçı häm İzrailneñ barlıq küzläw oyışmaların bergä cıyuçı strukturanıñ külämle operaśiyäse. Agentura “Xizbulla”nıñ kesä telefonnarına al’ternativa bularaq qullanılaçaq êlemtä cihazları satıp alırğa cıyınuın belep ala. Täêminat çılbırına ütep êlemtä çaralarınıñ êçenä 20 gramm tiräse PETN dip yörtelüçe şartlatqıç urnaştıralar. Annarı radio signalı qullanıp anı xäräkätkä kiterälär. Peydjerlarğa “Xizbulla” komandalığınnan xäbär cibärelgän şikelle itep signal kilä, härkem cihaznı qulına alıp yözenä yaqınlaştırğan waqıtta ul şartlıy. Şulay itep qullanuçılarnıñ yözlären yaralaw, küzlärenä zur zarar kiterü maqsat itep quyıla.

Çınlıqta, İzrail Livannı basıp alırğa telägän mizgeldä “Xizbuylla”nıñ saqlanuın zäğıyf’länderü öçen älege cihazlarnı şartlatırğa niyätlägän bulırğa tiyeş. Tik mäkerle plannıñ açılu ixtimalı arqasında anı irtäräk êşlärgä mäcbür bulalar. Näticädä, İzrail küzläw oyışması zur operaśiyä oyıştırıp “Xizbulla”ğa ähämiyätle däräcädä zarar birde. Meñnärçä “Xizbulla” äğ’zası yaralanğan bu höcümdä yuğaltular belän bergä xäräkätneñ yäşeren êlementları da açıqlandı. Anda, monnan tış, İrannıñ Livandağı ilçeseneñ dä yöze cäräxätlände.

İzrail “Xizbulla” belän däwam itüçe xärbi bäreleşülärneñ kontrolen tulısınça üz qulına aldı. Tup xäzer İran belän “Xizbulla” mäydanında. Ägär alar söylänülären ber qırıyğa quyıp, çınlap torıp cawap birä almasa, alğa taba da İzrailneñ nişanında bulaçaq. İzrail, uñaylı şartlar tuuğa, Litani yılğasına qadär mäydannı “Xizbulla”dan çistartu öçen operaśiyä başlayaçaq.

 Can ACUN

SETA agentlığınıñ tışqı säyäsät tikşerenüçese