Törki cömhüriyätlärneñ kön tärtibendäge waqıyğalar

2024nçe yılnıñ 8nçe-13nçe sentyabr könnärendä Qazaqstan başqalası Astanada 5nçe Bötendönya küçmä xalıqları uyınnarı ütkärelde. 5nçe Bötendönya küçmä xalıqları uyınnarınıñ açılış tantanasında Qazaqstan, Qırğızstan, Üzbäkstan, Tatarstan häm Saxa Däwlät başlıqları belän Mongoliyä êlekke İlbaşı, Törekmänstannıñ Xalıq Mäsläxäte başlığı, Törki däwlätlär oyışması, TÜRKSOY, Törki investiśiyä fondı, TürkPA, Törki mädäniyät häm miras waqıfı kebek xalıqara oyışmalarnıñ ğomum särqatipläre, törki cömhüriyätlärneñ sporttan cawaplı ministrları qatnaştı. 5nçe Bötendönya küçmä xalıqları uyınnarında 89 ildän 2 meñnän kübräk sportçı yarıştı.

5nçe Bötendönya küçmä xalıqları uyınnarı qısalarında 10nçı sentyabr könne Törki däwlätlär oyışmasınıñ Yäş’lärdän häm sporttan cawaplı ministrlarnıñ 8nçe cıyılışı uzdırıldı. Cıyılışta Qazaqstan, Qırğızstan, Macarstan (Vengriyä), Üzbäkstan häm Törkiyäneñ sport ministrları qatnaştı. Cıyılışta çirattağı 6nçı Bötendönya küçmä xalıqları uyınnarın Qırğızstanda ütkärü qararı qabul itelde.

Ağımdağı yılnıñ 9nçı sentyabr könne Törki däwlätlär oyışmasınıñ Ğadälät (yustiśiya) ministrlarınıñ berençe cıyılışı Qazaqstanda uzdırıldı. Cıyılışta Törki däwlätlär oyışmasına äğ’za illärneñ Ğadälät (yustiśiyä) ministrları qatnaştı. Cıyılış axırında Astana beldergese imzalandı.

Bıyıl 10nçı sentyabr könne Rusiyä Federaśiyäse Baş ministrı Mixail Mişustin Üzbäkstanğa räsmi säfär yasadı. Baş ministr Mişustin häm Üzbäkstan Baş ministrı Abdulla Aripov Üzbäkstan-Rusiyä xökümätlärara urtaq komissiyäseneñ 5nçe cıyılışın alıp bardı. Üzbäkstan İlbaşı Şäwkät Mirziyayev Rusiyä Baş ministrı Mişustinnı qabul itte.

2024nçe yılnıñ 11nçe sentyabr könne Törkiyä Cömhüriyäte saqlanu ministrı Yaşar Gülär Qazaqstanğa räsmi säfär yasadı. Ministr Gülär Qazaqstan saqlanu ministrı Ruslan Jaksılıkov belän söyläşü ütkärde. Qazaqstan İlbaşı Qasıym Comart Toqayev ministr Gülärne qabul itte.

11nçe sentyabr könneQırğızstan İlbaşı Sadır Caparov Kollektiv qurqınıçsızlıq kileşüe oyışması ğomum särqatibe İmangali Tasmagambetovnı qabul itte. Söyläşü waqıtında regional’ iminlek, urtaq xärbi künegülär kebek mäs’älälär quzğatıldı.

Ağımdağı yılnıñ 12nçe sentyabr könne Törkiyä Cömhüriyäte Tışqı êşlär ministrı Xaqan Fidan, Êçke êşlär ministrı Ali Yerlikaya häm Milli küzläw oyışması başlığı İbrahim Qalın Üzbäkstanğa säfär yasadı. Törek wäkillege Taşkent şähärendä üzbäk wazıyfadaşları belän söyläşü ütkärde. Cıyılış azağında Yul kartası dokumentına qul quyıldı. Üzbäkstan İlbaşı Şäwkät Mirziyayev törek delegaśiyäsen qabul itte. Şunı da iskärtep uzıyq, bu formatta cıyılış Törkiyä häm Üzbäkstan arasında berençe tapqır ütkärelde.

2024nçe yılnıñ 9nçı-11nçe sentyabr könnärendä Baqı şähärendä Törki dönya urtaq älifba komissiyäseneñ 3nçe cıyılışı ütkärelde. Cıyılışta Törki däwlätlär oyışmasına äğ’za illärdän räsmilär qatnaştı. Cıyılış axırında 34 xäreftän torğan Urtaq törki alfavit täq’dime mäs’äläsendä kileşügä ireşelüe iğ’lan itelde. 34 xärefle urtaq törki älifba Törki däwlätlär oyışması sammitında Däwlät başlıqlarınıñ raslawına täq’dim iteläçäk.

Ağımdağı yılnıñ 10nçı sentyabr könne Batumda Azärbaycan-Görcestan (Gruziyä)-Törkiyä saqlanu ministrlarınıñ 11nçe cıyılışı uzdı. Cıyılış azağında öç yaqlı kileşü memorandumına qul quyıldı. Kiläse atnada Görcestanda (Gruziyädä) şuşı illärneñ xärbiläre qatnaşında “Çiksezlek 2024” urtaq xärbi künegülär ütkäreläçäk.

Avtor - Abdrasul İsakov