Газалык бейтаптар Түркияга алып келинди

Газадан чыгарылган кээ бир онкологиялык бейтаптарды жана аларды коштоп жүргөндөрдү ташыган эки учак Түркияга келди.

Египеттин Эл Ариш аэропортунан учкан учактар ​​борбор шаар Анкарадагы Эсенбога аэропортуна конду.

Саламаттыкты сактоо министри Фахреттин Кожа да, Газага медициналык жардам, бейтаптар жана жаралууларды Түркияга алып келүү үчүн кечээ Египетте өткөргөн тыгыз сүйлөшүүлөрдөн кийин кээ бир бейтаптар менен бирге Анкарага кайтып келди.

Израилдин кол салуусуна кабылган Газадан чыгарылып, тез жардам унаалары менен Эл Ариш аэропортуна алынып келинген жана Президенттикке, Улуттук Коргоо министрлигине таандык учактарга жайгаштырылган бейтаптарды Эсенбога аэропортунда медициналык топтор тосуп алышты.

Учактан тез жардам унааларына которулган бейтаптарды дарылоонун Билкент шаардык ооруканасында жүргүзүлөрү белгилүү болду.

Бейтаптардын ден соолук абалдары сапар бою Түркиядан 9 кишилик адис медициналык кызматкер тарабынан көзөмөлдөндү.

Саламаттыкты сактоо министри Фахреттин Кожа эл аралык саламаттыкты сактоо дипломатиясы жана бул тармактагы иштеринин натыйжасында Газадан алынып келинген 27 бейтапты жана 13 коштоочусун Түркияга алып келүү менен маанилүү кадам ташташкандарын белгилеп, бейтаптарды Түркияга алып келүү аракеттерин чечкиндүүлүк менен уланта тургандарын айтты.

Министр Кожа: «Эч бир бейтап Египет аркылуу башка өлкөгө дарыланууга жөнөтүлгөн эмес. Бүгүн бул бейтаптар "Рефах" чек ара бекетинен түз Түркияга алып келинди»,- деди.