Эрдоган Микатини расмий азем менен тосуп алды

Президент Режеп Таййип Эрдоган Түркияга келген Ливандын премьер-министри Нажиб Микатини расмий азем менен тосуп алды.

Микати отурган расмий унааны Президенттик комплекстин алдындагы көчөдө тосуп алган атчандар, унааны протокол дарбазасына чейин коштоп барышты.

Президент Эрдоган Микатини Президенттик комплекстин негизги кире беришинде тосуп алды.

Эрдоган менен Микати азем аянтында орун алгандан кийин замбиректин 21 жолу атылышынын коштоосунда Улуттук гимн жана Ливандын улуттук гимни ойнолду. Микати аземдеги гвардиялык полктун аскерлерине салам айтты.

Аземде тарыхтагы 16 түрк мамлекетинин туулары жана аскерлери да орун алды.

Эки өлкөнүн делегацияларынын тааныштырылышынан кийин Эрдоган менен Микати тепкичте түрк жана Ливан желектеринин алдында сүрөткө түшүштү.

Эрдоган менен Микати бетме-бет жана делегациялар аралык жолугушуулардан кийин биргелешкен маалымат жыйынга катышат.