تطبیقات نظامی مشترک روسیه و تاجیکستان در مرز افغانستان

روسیه و تاجیکستان به  تعقیب نگرانی از افزایش تهدیدات تروریستی، تمرین نظامی مشترکی را در امتداد مرز با افغانستان برگزار کردند

به گزارش رسانه‌های تاجیکستان، بعداز بمیان آمدن نگرانی از «افزایش تهدیدات تروریستی»، روسیه و تاجیکستان تمرین نظامی مشترک چهار روزه «علیه هرگونه تهدید احتمالی» در مرز با افغانستان برگزار کردند.

براساس این گزارش، «تجهیزات نظامی روسیه در پایگاه 201 نظامی تاجیکستان نیزدراین تطبیقات نظامی حضورداشتند و تاکتیک‌های مختلف رزمی به ویژه تاکتیک‌های مقابله با گروه‌های تروریستی که به طور غیرقانونی وارد تاجیکستان می‌شوند را تمرین کردند».

در همین حال، کشورهای همسایه افغانستان بارها در مورد آنچه که به عنوان تهدیدات تروریستی ناشی از افغانستان تلقی می‌شود، ابراز نگرانی کرده‌اند.

طالبان تاکنون در مورد این تطبیقات نظامی مشترک که در نزدیکی افغانستان برگزار شده است، اظهار نظری نکرده است.

گفتنی است که در سال گذشته نیز نیروهای مسلح دو کشور روسیه و تاجیکستان تطبیقات نظامی مشترکی را در 20 کیلومتری مرز افغانستان برگزار کردند.

شایان ذکر است که پایگاه 201 نظامی مستقر در تاجیکستان بزرگترین مرکز نظامی روسیه در خارج از مرزهای این کشور است.

این پایگاه نظامی در شهرهای دوشنبه و باختر قرار داشته و به منظور «نگرانی از رشد تروریزم در افغانستان» تشکیل شده است.