İsrailin Qəzzaya hücumları nəticəsində ölən jurnalistlərin sayı açıqlandı

Mühasirə altındakı Qəzza zolağına iki aydır edilən hücumlarda 75 jurnalist həyatını itirib, 80-ə yaxın jurnalist də yaralanıb.
Fələstin Jurnalistlər Birliyi İsrailin iki aydır davam edən hücumlarında həyatını itirən, yaralanan və saxlanılan jurnalistlərlə bağlı hesabat yayıb.
Hesabata əsasən, hücumlarda 75 jurnalist həyatını itirib, 80-ə yaxın jurnalist yaralanıb. Hesabatda həmçinin 2 jurnalistin itkin düşdüyü bildirilib.
İsrailin minlərlə dinc sakinin ölümünə, on minlərlə insanın yaralanmasına səbəb olan hücumlarında yüzlərlə hərbi cinayət və qanun pozuntusu törətdiyi qeyd edilib.
Hesabatda hücumlarda ailəsini və yaxınlarını itirmiş jurnalistlərin çalışdığı media mərkəzlərinin də dağıdıldığı bildirilib.
İsrailin hücumlarında 60 jurnalistin ailəsinin evinin bombalandığı, 63 media qurumunun və ofisinin dağıdıldığı vurğulanıb.
Hücumlar nəticəsində biri işğal altındakı İordan çayının qərb sahilində, 24-ü Qəzza zolağında olmaqla 25 yerli radiostansiyanın fəaliyyətində fasilələr yaranıb.

Bu müddət ərzində İsrail rəhbərliyi 3 media qurumunu bağladı və 41-i İordan çayının qərb sahilində, 2-si də Qəzzada olmaqla 43 jurnalisti saxlayıb və ya həbs edib.
Hesabatda vurğulanıb ki, Fələstin Jurnalistlər Birliyi jurnalistlərin təhlükəsizliyini təmin etmək, onların peşələrini yerinə yetirmələrini təmin etmək, beynəlxalq müdafiəni təmin etmək, habelə  İsrailin hücumlarda həyatını itirən jurnalistlərin ölümünə görə məsuliyyət daşıması və mühakimə olunması üçün ciddi səylər göstərir.