Rusiya MN: İngiltərənin Ukraynaya verdiyi silahlar bir sıra nəticələrə səbəb ola bilər

Rusiya Müdafiə Nazirliyi İngiltərənin Ukraynaya verdiyi silahlar Rusiya ərazisindəki hədəflərə hücum etmək üçün istifadə ediləcəyi təqdirdə Kiyevdəki qərar qəbuletmə mərkəzlərinin vurulacağını bildirib.

Nazirlikdən verilən açıqlamada İngiltərənin müdafiədən məsul dövlət naziri Ceyms Hippiyin Ukraynaya verilən silahlarla Rusiya ərazisindəki hədəflərə hücum etməyin “problem olmayacağını” söylədiyi xatırladılıb.

Açıqlamad Rusiya ordusunun Kiyevdəki qərar qəbuletmə mərkəzlərinə uzaqmənzilli yüksək dəqiqlikli idarə olunan raketlərlə cavab hücumları etməyə 24 saat hazır olduğu bildirilib:

"Londonun Kiyev rejimini bu cür hərəkətlərə birbaşa təhrik etməsinin, cəhdin (Rusiya torpaqlarına hücum) həyata keçirilməsi halında bizim dərhal mütənasib reaksiyamıza səbəb olacağını vurğulamaq istəyirik. Kiyevdəki Ukraynaya aid qərar qəbuletmə mərkəzlərində Qərb ölkələrdən hər hansı birinin vətəndaşı olan müşavirlərin olması Rusiyanın cavabı ilə bağlı qərarında problem təşkil etməyəcəkdir".