امریکا سوریه ده ترور تشکیلاتی نینگ اشغالی آستیده گی نفت ساحه لریگه حربیلرینی جایلشتیرماقده

امریکا قوشمه ایالتلری، سوریه ده بولووچی ترور تشکیلاتی وای پی جی/پی کاکانینگ اشغالی آستیده گی نفت ساحه لریده جایلشگن عسکری مرکز و نقطه لریگه قوشیمچه کوچ جونتماقده.

امریکا قوشمه ایالتلری اردوسی، حسکه و دایرالزور ولایتلریده گی نفت ساحه لریده جایلشگن عسکری مرکز و نقطه لریگه عراق آرقه لی قوشیمچه حربی و لوجستیک کوچ جونتماقده.

حسکه ده گی محلی منبعلردن آلینگن معلوماتگه کوره، عراقده جایلشگن امریکا قوشمه ایالتلری کوچلری، توناون کیچه حسکه شدادی منطقه سیده گی جبس نفت ساحه سیگه 50 تیرلدن عبارت بیر عسکری قطار جونتدی. قطارده کتته کیچیک موتر، ایش ماشینلری و تیرللر اورین آلگن لیگی بیلدیریلدی.  

امریکا قوشمه ایالتلری اردوسی آلدینگی کون هم الولید حدود ایشیگی آرقه لی پرسونل تشووچی 9 زره لی واسطه و 50 عسکردن عبارت قوشیمچه کوچینی دایرالزور عمر نفت ساحه سیگه جونتگن ایدی.

سوریه ده نفت ساحه لریده عسکری مودیتینی کوپه یتیرماقچی بولگن امریکا قوشمه ایالتلری اردوسی، ترور تشکیلاتی وای پی جی /پی کاکانینگ اشغالی آستیده گی بو منطقه لرده گزمه قیلیب دوام ایتماقده.

امریکا قوشمه ایالتلری کوچلری سوریه ده حسکه، رقه و دیرالزور ولایتلریده وای پی جی / پی کاکا اشغالی آستیده گی منطقه لرده توپلم 11 حربی مرکز و عسکری نقطه ده موجودیتینی دوام ایتتیرماقده.