تورکیه جمهور باشلیغی ایردوغان بیرلشگن ملتلر تشکیلاتی عمومی کینگشیده سوزگه چیقدی
رجب طیب ایردوغان کون ترتیبیده گی موضوعلرنی کینگ کولملی تیلگه آلدی
تورکیه جمهور باشلیغی رجب طیب ایردوغان بیرلشگن ملتلر تشکیلاتی خوفسیزلیک کینگشی نینگ ایندی دنیانینگ خوفسیزلیگی نینگ کفالتی بولیشدن چیقیب 5 اولکه نینگ سیاسی ستراتیژیلری نینگ توقنه شوو ساحه سی وضعیتی گه ایلنگن لیگینی ایتدی.
تورکیه جمهور باشلیغی رجب طیب ایردوغان امریکا قوشمه ایالتلری نینگ نیویورک شهریده گی بیرلشگن ملتلر تشکیلاتی نینگ 78- عمومی کینگشیده سوزگه چیقدی.
" بیرلشگن ملتلر تشکیلاتی باش کاتبی انتونیو گوترش نینگ " 2- جهان اوروشیدن کیین قوریلگن باشقرمه لر بوگونگی دنیانی عکس ایتتیرمه یدی"دیگن تثبیتی گه تورکیه نینگ هم قوشیلگن لیگینی معلوم قیلگن ایردوغان،
" بیرلشگن ملتلر تشکیلاتی خوفسیزلیک کینگشی نینگ ایندی دنیانینگ خوفسیزلیگی نینگ کفالتی بولیشدن چیقیب 5 اولکه نینگ سیاسی ستراتیژیلری نینگ توقنه شوو ساحه سی وضعیتی گه ایلنگن" دیدی.
بیرلشگن ملتلر تشکیلاتی نینگ باشچیلیگیده دنیانینگ خوفسیزلیگینی، برقرارلیگینی، تینچلیگینی تامین ایته دیگن باشقرمه لرنی تیزده قیته تیکلش کیره ک لیگینی تاکییدله گن ایردوغان،
"بیز جغرافیه سی بیلن جمعیت شناسلیگی بیلن دنیاده گی برچه قبیله لردن، اعتقادلردن، مدنیتلردن وکالت ظرفیتی گه ایگه بیر گلوبال باشقروو معماریسی بنا قیلیشیمیز کیره ک." دیدی.
2022 ییلی فبروری آییدن بیری دوام ایتیب تورگن روسیه – اوکراین اوروشینی تیلگه آلگن ایردوغان جنابلری، تورکیه نینگ اوکراین نینگ مستقل لیگی و توپراق بوتونلیگی اساسیده دیپلوماسی و دیالوگ بیلن اداغگه ییتکیزیلیشی بوییچه اورونیشلرینی کوچلی شکلده آلیب باره جگینی معلوم قیلدی.
تورکیه جمهور باشلیغی سوریه نینگ توپراق بوتونلیگی و سیاسی بیرلیگی گه اینگ بویوک تهدیدنینگ بو اولکه نینگ اوستیده حساب – کتابی بولگن کوچلرنینگ حمایه سیده گی ترور تشکیلاتلریگه بیریلگن آچیق کمک ایکن لیگی گه دقت تارتدی.
"سوریه و عراق قاله ویرسه اورته شرق، شمالی افریقا و ساحل ده اوز منفعتلری اوچون داعش و اونگه اوخشه گنلرنی آله ایتیب ایش آلگنلرنینگ ایککی یوزلمه چیلیکلریدن بیزدیک." دیب ایتدی.
ایردوغان فقط اوز سیاسی و اقتصادی منفعتلری اوچون ترور تشکیلاتلری بیلن ایشلش گه دوام ایتگن اولکه لرنینگ ترورچیلیکدن و تیگیشلی معمالردن شکایت قیلیش گه حقی یوقلیگینی قید ایتدی.
اورته شرقده دایمی تینچلیک نینگ برقرار بولیشی نینگ فقط فلسطین – اسرائیل معماسی نینگ نهائی ییچیم گه ییتکیزیش بیلن ممکن بوله جگینی ایتدی.
ایردوغان "1967 چیگره لری اساسیده مستقل و جغرافی بوتونلیگی تامین ایتیلگن فلسطین دولتی یراتیلمه ی اسرائیل نینگ هم امید قیلگن تینچلیک و خوفسیزلیک نی قولگه کیریتیشی قیین دیر." دیب ایتدی.
"بیزنینگ هیچ کیم نینگ حقی گه کوزیمیز قالگن یوق، شونده دی بولیب هیچ کیم نینگ حقلریمیزنی یوق کوریشی گه فرصت بیرمه یمیز" دیگن ایردوغان خلق ارا همجمعیت نی شمالی قبرس تورک جمهوریتی نینگ مستقل لیگینی تن آلیش گه و بو اولکه بیلن سیاسی، دیپلوماتیک و اقتصادی مناسبت قوریش گه چقیردی.
جمهور باشلیغی تورکیه نینگ اروپا بیرلیگی گه اعضالیگی حقیده،
"اروپا بیرلیگیدن اولکه میز بیلن تیگیشلی مسؤلیتلرینی بجا کیلتیریشینی کوتماقده میز. تورکیه گه تیگیشلی آلیب باریلگن قرارسیزلیک یانداشوولرنینگ یکونلنیشی کیره ک." دیدی.
آذربایجان – ارمنستان معماسی حقیده هم گپیرگن ایردوغان ایککی اولکه اورته سیده گی اوچره شوو جریانینی باشدن بیری قوللب – قوتله گن لیکلرینی بیراق ارمنستان نینگ بو تاریخی فرصتدن فایده لنمه گن لیگینی معلوم قیلدی.
ارمنستان نینگ زنگزور کوریدوری نینگ آچیلیشی قاله ویرسه بیرگن وعده لریگه وفا قیلیشینی کوتگن لیکلرینی افاده ایتگن ایردوغان جنابلری،
"ایندی برچه تن آلگندیک قاره باغ آذربایجان توپراغی دیر. بوندن تشقری ایریم بیر نرسه نی تحمیل قیلیش اصلا قبول قیلینمه یدی." دیدی.
