تورکیه نینگ تاریخی چنق قلعه شهری حقیده قیسقه معلومات

چنق قلعه, تورکیه نینگ شمالغربیده جایلشگن اوروپا و آسیا قطعه لری نی بیرلشتیرگن تنگه نینگ ایککی تامانیده قوریلگن بیر شهردن عبارت... موقعیتی جهتی دن آلیب قره گنده جوده هم بای بیر تاریخی اوتمیش گه ایگه. 

چنق قلعه نینگ میلاد دن آلدین 3000 – ییلدن بیری مسکونی نقطه دن عبارت ایکن لیگی بیلینماقده. 

چنق قلعه, انادولو بیلن اوروپا و آقدینگیز بیلن قاره دینگیز نی ارتباط بیرگن ایککی منطقه دن بیری نی تشکیل ایتماقده... شوباعث, تاریخ دوامیده کوپلب کیشی لر یشش و اشغال اوچون اوشبو جغرافیه گه کیلگن. 

جایله شیش یاکه اشغال اوچون کیلگن اوشبو کیشی لر چنق قلعه ده فرقلی فرهنگ لرنینگ حاکم بولیشی گه سبب بولگن.  تاریخ دوامیده بونده ی حادثه لرنینگ یوز بیرگن لیگی سببلی, حاضرگی کونده چنق قلعه نینگ جوده هم بای بیر فرهنگی موزائککه ایگه ایکن لیگی کورینماقده. 

تنگه نینگ اینگ تار قسمیده عثمانی دولتی نینگ پادشاه سی بولگن فاتح سلطان محمد دوریده اوروپا تامانیده کلید بحر و انادولو قسمیده ایسه سلطانیه یاکه چنق قلعه سی قوردیریلدی.  تورکیه نینگ اوشبو ولایتی نینگ آتی انادولو قسمیده گی چنق قلعه سی سببلی چنق قلعه بولگن. 

میلاد دن آلدین 1200 – ییلی گه قدر منطقه ده ترویا خلقی یشب کیلگن.  کیین چه لیک ایسه ترویا اوروش لری بیلن باشقه قوم لر خوددی شوو جغرافیه گه کیلیب جایلشگن.  اوشبو دوردن کیین انادولوده تحریری تاریخ جهتی دن قارانغو دور باشله گن.  منطقه لیدیا قراللیگی, پرس لر, مقدونیه قراللیگی, روم و بیزانس امپراطورلیک لری آرتیدن ایسه تورک دولتی دن عبارت بولگن عثمانی دولتی نینگ حاکمیتی آستی گه اوتگن. 

چنق قلعه ده تاریخ نینگ اینگ کتته اوروش لریدن بیری یوز بیرگن...

بیرینچی دنیا اوروشی جریانیده, چنق قلعه تنگه سیدن اوتیش, استانبول نی قولگه کیریتیش و شونده ی قیلیب قاره دینگیز گه ییتیب باریش گه حرکت قیلگن انگلستان و فرانسه کوچ لری, چنق قلعه تنگه سی نی محاصره قیلدی.  باتور تورک اردوسی ایسه دشمن لر گه قرشی اوروشیب اولرنینگ چنق قلعه تنگه سیدن اوتیشی گه اجازت بیرمه دی.  تورک اردوسی دشمن لرنینگ برچه هجوم لری نی دفع قیلیب تاریخ صفحه لری گه اوز آتینی یازدیریش گه موفق بولدی. 

تورکیه نینگ چنق قلعه ولایتی چیگره لری ایچیده اورین آلگن, بیرینچی دنیا اوروشی جریانیده قانلی توقنه شوو لرنینگ یوز بیرگن گیلیبولو یریم ارالی ملی پارکی, تقریباً بیر اوروش موزیمی گه اوخشه ماقده.  دشمن لری گه قرشی اوروشگن باتور تورک اردوسی نینگ اون مینگلب شهیدی اوچون یادگارلیک لر و شهید لیک لر موجود خوددی شوو ییرنینگ اوزیده. 

عینی دمده اوشبو ییرده اشغالچی کوچ لردن عبارت انگلستان, فرانسه, آسترالیا و نیوزیلند عسکر لری اوچون قوریلگن یادگارلیک لر هم موجود. 

چنق قلعه ده گی اوروش نینگ تاثیری نی کورماقچی بولسنگیز اگر, کلید بحر قلعه سی, نمازگاه, جونکبایری, یالنیز چام یادگارلیگی کبی منطقه لر بیلن, 57 نچی پیاده لواسی شهید لیگی و شهید لر آبده سی نی باریب کوریشینگیز نی توصیه ایته میز.  عینی دمده گیلیبولو یریم ارالی نینگ همه جایی ده اوروش نینگ منفی تاثیر لری نی کوریشینگیز ممکن. 

آسترالیا و نیوزیلند عسکر لری تامانیدن حمله قیلینگن و خوددی شوو عسکر لرنینگ جدی تلفات بیرگن جایده هر ییل 25 اپریل ده ایسلش مراسمی بولیب اوتماقده.  بیر بیر لری گه قرشی اوروشگن کیشی لرنینگ نبیره لری اوشبو مراسم گه اشتراک قیلیب حُزن لری نی اورتاقله شه دیلر. 

خوددی شوو اوزی گه خاص تاریخی اوتمیشی سببلی گیلیبولو یریم ارالی ملی پارکی, دنیا ده اینگ کوپ توریست کوتیب آلیاتگن ملی پارک لر آره سیده اورین آلماقده. 

چنق قلعه گه سفر قیلیشینگیز تقدیرده, گیلیبولو یریم ارالی ده گی شهیدلیک لردن تشقری, یونسکو دنیا میراثی لستیده اورین آلگن ترووا آرکئولوژیک ساحه نی کوریب چیقیشینگیز نی هم توصیه ایتیب قاله میز. 

اسسوس ده گی آتن معبدی, تاریخده بیرینچی مرته گوزه للیک مسابقه لری نینگ بولیب اوتگن قازداغلری, گوکچه اده و بوزجه اده منطقه لری هم باریب کوریلیشی کیره ک بولگن باشقه جای لرنی تشکیل ایتماقده.