ترکیه سومالیده گی تروریستیک هجومنی قاره له دی و عاجل یاردم ییتکیزدی
تروریستیک هجومده اولگنلر سانی نینگ 300 کیشینی آشگنی بیلدیریلدی.
جمهور رئیس رجب طیب ایردوغان تناون سومالی نینگ پایتختی موگادیشوده 300 کیشی نینگ اولیشی گه باعث بولگن تروریستیک هجومینی قاره له دی.
جمهور رئیس ایردوغان هجوم آرتیدن سومالی جمهور رئیسی محمد عبدالله فرماکوگه یوبارگن پیامیده، ترور حادثه سی عاقبتیده کوپ سانده کیشی نینگ جان بیرگن و یره لنگنی حقیده‌گی معلوماتنی چوقور قیغو بیلن آلگنلیگینی ایسله تیب؛
«سومالی نینگ برقرارلیگی و خوفسیزلیگینی نشانگه آلگن اوشبو هجومنی قتتیق قاره له یمن. تورکيه تروریزمگه قرشی سومالی حکومتی و قرداش سومالی خلقی بیلن اوز هم جهتلیگینی دوام ایتتیره دی. شو دایره ده تیز یاردم اوچاغی و طبي تجهیزاتلرنی تأمینلش بیلن بیر قطارده تن جراحتی آلگنلرنی تورکيه ده دوالش داخل هر قنده‌ی یاردم تیارگرلیگی اوچون امر بیردیم» دیدی.
جمهور رئیس ایردوغان دهشتلی هجوم عاقبتیده جان بیرگنلرگه اللّه دن رحمت، تن جراحتی آلگنلرگه شَفا تیلب، سومالی حکومتی و خلقیگه چقور تعزیه اظهار ایتدی.
باش وزیر بن علی ییلدیریم هم سومالی باش وزیری حسن علی کییریگه یوبارگن پیامی آرقه لی تعزیه اظهار ایتیب، سومالی حکومتی و خلقی نینگ یانیده ایکنلیکلرینی ییتکزدی.
ایتیب اوتیش جایزکه تورکيه جمهوریتی ساغلیقنی سقلش وزیری احمد دیمیرجان سومالی حکومتینی قوللب-قوّتلش و یره دارلرنینگ دوالنیشی اوچون اولرنی تورکيه گه آلیب کیلیش ایشلرینی موافقلشتیریش فعالیتلرینی تیزلشتیریش مقصدیده بوگون کیچه سی سومالی گه قره ب یول آله دی.
ساغلیقنی سقلش وزیرلیگی تامانیدن بیریلگن بیاناتگه کوره احمد دیمیرجان نینگ سومالیگه قره ب یول آلیشیدن آلدین کیره کلی دارو-درمانلر، طبي تجهیزاتلر و متخصص شفاکارلر حربي اوچاق آرقه لی منزلگه ییتکزیلدی.
ینه خوددی منه شو بیاناتگه کوره ایرته‌گه آقشام وقتیده تورکيه ده بولیشی کوتیلگن 50 یره دارنینگ دوالنیشی اوچون مملکتده‌گی تورلی کسلخانه لرده کیره کلی چاره و تدبیرلر آلیندی.
عاجل طبي یاردم خدمتلری باش مدیرلیگی هم سومالیده‌گی یر ه‌دارلرنینگ تورکيه‌گه آلیب کیلینیشی اوچون 16 کیشی گه وظیفه تاپشیردی.
سومالیده ساغلیقنی سقلش وزیرلیگی قاشیده اوز فعالیتلرینی دوام ایتتیرگن رجب طیب ایردوغان آتیده‌گی کسلخانه ده هم هجومده یره لنگن 200 کیشینی دوالش ایشلری آلیب باریلماقده.
باشقه بیر تاماندن تروریستیک هجومده اولگنلر سانی نینگ 300 کیشینی آشگنی بیلدیریلدی.
