بوگون تاریخده قنده ی ینگی لیک لر یوز بیردی؟ 3 نوامبر

1839- ییل 3 نوامبرده, عثمانی امپراطورلیگی ده "گلخانه خط همایونی" اعلان ایتیلدی.  تنظیمات دوری نی باشلتگن اوشبو بیانات بیلن اولکه ده گی دموکراتیک له شیش بوییچه سعی و حرکت لر بیرینچی مرته قانونی بیر حالت گه ایگه بولدی.

1957- ییل 3 نوامبرده, سویت اتفاقی, ایککینچی مصنوعی ستلایتی بولگن اسپوتنیک 2 نی فضا گه یوباردی.  اوشبو ستلایت ده فضا گه کیتگن بیرینچی حیوان دن عبارت بولگن لایکا اسمی گه کوپک هم بار ایدی. 

1982- ییل 3 نوامبرده, افغانستان ده سالنگ تونلی ده یانغین حادثه سی یوز بیردی. اوشبو حادثه عاقبتیده ایککی مینگ دن آرتیق کیشی هلاکت گه اوچره دی. 

1983- ییل 3 نوامبرده, دنیا نینگ 5- اینگ کتته بندی دن عبارت بولگن اتاتورک بندی و برق سنترالی نینگ تهدابی قویلدی.  11 ییل ده تکمیل بولگن اوشبو بند نینگ کول ساحه سی ایسه 817 کیلومتر مربع دن عبارت. 

1985- ییل 3 نوامبرده, فرانسه لیک ایککی جاسوس, نیوزیلند ده گرین پیس کیمه سی رینبو واریور نی باتیریش بیلن عیبلَندی. 

1992- ییل 3 نوامبرده, ایلینوی سناتوری دموکرات کارول موسلی- براون, امریکا قوشمه ایالتلری سناسی گه سیلنگن بیرینچی قاره تنلی عیال دن عبارت بولدی. 

1996- ییل 3 نوامبرده, تورکیه نینگ بالیکسیر ولایتی سوسورلوک تومنیده یوز بیرگن ترافیکی حادثه نتیجه سیده امنیه قوماندانی حسین کوجه داغ بیلن بیرگه اوچ کیشی جان بیررایکن, توغری یول حزبی نینگ اورفا ولایتی وکیلی سادات ادیب بوجاک ایسه یره لندی.  اولگن کیشی لردن بیری نینگ ایسه محمد اوزبای اسمی بیلن تقلبی تذکره گه ایگه عبدالله چاتلی ایکن لیگی انیقلندی.  اوشبو حادثه تورک تاریخیده "سوسورلوک حادثه سی" عنوانی بیلن ذکر ایتیلگن وضعیتده. 

2002- ییل 3 نوامبرده, تورکیه ده وقتی دن آلدین عمومی سیلاو بولیب اوتدی.  اوشبو سیلاو نتیجه سیده فقط گینه جمهوریت خلق حزبی بیلن ینگی قوریلگن عدالت و توسعه حزبی پارلمان ده اورین آلیش گه موفق بولدی.  پارلمان ده 363 کرسی گه ایگه بولگن عدالت و توسعه حزبی, ائتلاف قورمسدن حکومت نی قوریش امکانیتی نی کسب ایتدی.