ینگی باسقیچده تورکیه نینگ سوریه بوییچه سیاستی توغریسیده بیر تحلیل یازووی
تحلیل و تیکشیروو
ینگی باسقیچده تورکیه نینگ سوریه بوییچه سیاستی توغریسیده بیر تحلیل یازووی
تورکیه ده بولیب اوتگن حساس سیلاولرنینگ آرتیدن جمهور باشلیغی رجب طیب ایردوغان قیته دن جمهور رئیس ایتیب سیلندی. جمهور اتفاقی هم مجلسده کوپچیلیک نی قولگه کیریتدی. خوف ایندی بو نتیجه لر تورکیه نینگ سوریه سیاستی بوییچه نیمه معناگه کیله دی؟ ایردوغان و ینگی کابینه سی نینگ سوریه سیاستی، بشارالاسد توزومی بیلن بوله دیگن مذاکره لر، تروریزم گه قرشی کوره ش و قاچقین معماسی توغریسیده قنداغ آلغه باره دی؟
تشقی سیاست بوییچه تیکشیرووچی و یازووچی جان اجون نینگ موضوع بوییچه تحلیل یازووینی تقدیم ایته میز.
تورکیه ده 14 و 28 می تاریخلریده کیتمه کیت سیلاو اوتکزیلدی. اولکه نینگ سیاسی تقدیری تعیینلنگن بو سیلاولرده هم مجلسده کوپچیلیک نی همده جمهور رئیسلیک نی رجب طیب ایردوغان باشچیلیگیده گی جمهور اتفاقی قازاندی. شونده ی بولیب تورکیه ینه بیش ییل گچه ایردوغان تامانیدن باشقریله دی. ایردوغان نینگ "تورکیه عصری" ایتیب اته گن بو ینگی باسقیچ هم تورکیه جهتیدن همده منطقه و گلوبال سیاست جهتیدن هم نتیجه لری بوله دی. تورکیه درحقیقت بیر منطقه کوچی بولیش نینگ یانیده عین حالده ادعالی بولگن و گلوبال بیر اکتور بولیش گه اورونگن بیر اولکه وضعیتیده. بیراق بو مسئله ده سیلاو نتیجه لرینی سوریه بیلن مناسبت بیریب ینگی ایردوغان باسقیچی نینگ سوریه سیاستی گه بولگن تاثیرینی تیلگه آله میز.
ینگی باسقیچده ایردوغان نینگ سیاسی رهبریتی آستیده تورکیه نینگ موجود تشقی سیاستی اینیقسه سوریه ده قنداغ بوله جگینی اعلان قیلگن کابینه دن کوریش ممکن. ملی استخبارات تشکیلاتی (میت) نینگ باشلیغی خاقان فیدان نینگ تشقی ایشلر وزیری ایتیب تعیینلنیشی مهم دیر. خاقان فیدان اوزاق ییللر میت نینگ باشلیغی بولیشی، بو باشقروونی هم تخنیک ظرفیت همده ساحه فعالیتلری جهتیدن انچه کوتردی. تورکیه نینگ اینیقسه عراق، سوریه، لیبیا کبی توقنه شوو منطقه لریده گی برچه حربی، استخباراتی و سیاسی فعالیتلریده سوز ایگه سی ایتیب جهت بیرگن بیر سیما اوله راق قرشیمیزده دیر. اونینگ توغریدن توغری تشقی سیاست نینگ باشقرووچیسی بولیشی تورکیه جهتیدن عراق و سوریه سیاستیده بیر یوتوق نینگ دوامی بوله دی. ینه قوراللی کوچلری قومندانی یشر گولر هم شونقه بیر پروفایل گه ایگه. او تورکیه نینگ عراق و سوریه ده چیگره دن تشقری حربی عملیاتلرینی هم سیاسی اوله راق همده نظامی اوله راق ساحه ده باشقرگن بیر کیشی دیر. یشر گولر ایروغان نینگ ینگی کابینه سیده مدافعه وزیری بولدی. بو ایسه موجود حربی عملیاتلرنینگ دوام ایتیب باریشی معناسیگه کیله دی. شونده ی بولیب ابراهیم قلین نینگ ایردوغان نینگ سوزچیلیگی ویا ملی خوفسیزلیک مصلحتچیلیگینی قیلگن بیر سیما اوله راق ایندی میت نینگ باشی گه اوتدی. بو اوچ سیما هم ایردوغان و بیر بیرلریگه ماس کیله دی. موجود سیاستلرنی قوللب – قوتلاوچی سیمالر اوله راق تیگیشلی تشقی سیاستلرنینگ دوام ایتیشینی تامین ایته دی. بناً تورکیه نینگ سوریه بیلن تیگیشلی بنیادی سیاستی گه اوزگریش یوز بیرمسلیگینی کوریش ممکن.
ینگی کابینه اوچون سوریه ده گی تهدیدلر اوزگرمه ی دوام ایتماقده. اینیقسه پی کاکانینگ سوریه ترماغی پی وای دی/وای پی جی نینگ فرات نینگ شرقی قاله ویرسه شمال – شرقیده ایجاد ایتیش اوچون اورونیلگن ترور دولتچیلیگی تورکیه نینگ ملی خوفسیزلیگینی بیرینچی درجه تهدید ایتماقده. تورکیه آلدین آلیب بارگن چیگره دن تشقری حربی عملیاتلری بیلن ترور تشکیلاتی گه کتته ضربه لر اورگن حالده امریکا قوشمه ایالتلری حمایه سی آستیده ترور تشکیلاتی تاباره کوچ قازانیب موجودیتی گه دوام ایتماقده. اولکه ده گی طبیعی منبعلردن عاید قولگه کیریتیب آیدولوجیک اوله راق هم اوزینی قانیقتیریش گه دوام ایتماقده. بیراق تورکیه جهتیدن یگانه معما ترور تشکیلاتی ایمس.
- تروریزم گه قرشی کوره ش پی کاکا/وای پی جی نینگ امریکا قوشمه ایالتلری حمایه سیده منطقه ده ایجاد ایتیش گه اورونگن دولتچیلیک نینگ بوتونله ی اورته دن کوتریب تشلش.
- سوریه نینگ توپراق بوتونلیگینی قوریقلب سیاسی ییچیم، مخالفلرنینگ سیاسی سیستم گه قوشیش و بشارالاسد رژیمی نینگ دموکراتیکلشیب ینگیلنیشی.
- سوریه نینگ قیته قوریش فعالیتلری بیلن خوفسیزلیک و برقرارلیک که ایریشیب قاچقینلرنینگ اولکه لریگه قیتیب باریشی.
تورکیه فقط تروریزم گه قرشی کوره شده ایمس یوقاریده تذکر بیریلگن برچه مسئله لر بوییچه سوریه سیاستی گه دوام ایته دی. شو وقت روسیه نینگ ضمانتیده بشارالاسد رژیمی بیلن آلیب باریلگن سیاسی مذاکره لرنینگ قنداغ نتیجه لنیشی جوده مهم. شونده ی بولیب مشترک اوزارا منفعتلر دایره سیده مشترک بیر زمینه ده کیلیشگنده تورکیه نینگ خواهله گنینی سیاست میدانیده قولگه کیریتگن بوله دی. بیراق عکسینچه بیر وضعیتده حربی عملیاتلرگه دوام ایتیش گه مجبور بوله دی. بو جریانده امریکا قوشمه ایالتلری – روسیه – ایران اورته سیده یوزبیرگن توقنه شوو و کوره شدن فایده لنیب اوز ملی خوفسیزلیگینی تیست ایتیش گه اورونه دی.
تشقی سیاست بوییچه تیکشیرووچی و یازووچی جان اجون نینگ موضوع بوییچه تحلیل یازووینی تقدیم ایتدیک.
