بشارالاسد تیزیمی انقلاب باشلنگن شهر درانی هدف قرار بیرگن
تحلیل و تیکشیروو 27
بشارالاسد تیزیمی انقلاب باشلنگن شهر درانی هدف قرار بیرگن
سوريه نینگ جنوبیده روسیه و اېران تامانیدن قۉللب-قوّتلنگن بشار الاسد تیزیمی نینگ درا‌گه قره‌تیلگن هجوملری دوام ایتماقده. سوريه‌لیک مخالف گروه نینگ قلعه‌لریدن بیری حسابلنگن و سوريه تونتریشی باشله‌گن درا منطقه‌سیگه قره‌تیلگن هجوملر یاردمیده تیزیم کوچلری کتّه یوتوقلرگه ایریشر ایکن تینچ اهالی اردون چیگره‌سی تامان یول آلگن وضعیتده. اردون نینگ چیگره دروازه‌لرینی آچمسلیگی بیلن بیرگه‌لیکده اردون-سوريه چیگره‌سیده دهشتلی بشری بحران، انساني فاجعه یوز بیرماقده. سوريه‌لیک حربي مخالف نینگ تیزیم آلدیده بیرگه‌لیکده فعالیت آلیب بارالمسلیگی و بعضی گروهلر نینگ روسیه نینگ اورته‌مچیلیگی یاردمیده تیزیم بیلن کیلیشیب آلیشی نتیجه‌سیده بیر نیچه شهر اوروش-جنجلسیز تیزیم کوچلری نینگ نظارتی آستیگه اوتدی. جنوبي سوريه‌ده‌گی وضعیت نینگ باشقه بیر جهتی ایسه ایسراییل-ایران بحرانی دیر. ایران تامانیدن قوللب-قوّتلنگن جنگریلر نینگ اسراییل چیگره‌سیگه یقینلشیشی، ایکّله مملکت اورته‌سیده‌گی بحران نینگ اوج آلیشیگه یول آچیشی ممکن.
(سیاست، اقتصاد و جمعیت تدقیقات بنیادی) یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایته‌میز.
جاری ییل نینگ جون آیی نینگ باشلریده بشار الاسد تیزیمی نینگ درا‌گه قرشی عملیات باشله‌تیشی اوچون تیارگرلیک کوره‌یاتگنلیگی حقیده‌گی معلوماتلر ترقه‌گن ایدی. آرتیدن تیزیم نینگ حربي معناده‌گی تیارگرلیکلری و منطقه‌گه اوتیشلری عملیاتدن خبر بیره‌یاتگندیک ایدی دیسه‌ک مبالغه بولمه‌یدی. درا‌ده تیزیم کوچلری و سوريه مخالفی اورته‌سیده اوتگن ییللرده جدّي روشده توقنه‌شوو و اوروشلر بولمه‌دی. چونکه روسیه و امریکا قوشمه ایالتلری منطقه‌گه قرشی تیل بیریکتیریب، منطقه‌نی بحراننی کمه یتیریش منطقه سی دییه تن آلگن. فقط تیزیم مذکور عملیاتلرینی باشلر چاغیده امریکالیک رسميلر نینگ سوريه‌لیک مخالفنی حمایه قیلمسلیگی و سیاسي جهتدن یاردمینی توخته‌تیشی حقیده‌گی معلوماتلر عامه‌وي اخبارات واسطه‌لریده ا‌ورین آلدی. امریکا قوشمه ایالتلری نینگ اردون‌ده‌گی ایلچیخانه‌سی تامانیدن سوريه‌لیک مخالف گروهلر نینگ رهبرلریگه یوباریلگن بیاناتده برچه شرطنامه‌لر و گپ-سوزلرگه قره‌مه‌ی امریکا قوشمه ایالتلری نینگ روسیه و تیزیم کوچلری آلدیده مخالفنی حمایه قیلمسلیگی معلوم قیلینگن ایدی. درا‌گه قرشی روسیه و بشار الاسد تیزیمی نینگ هوا هجوملری باشلشی آرتیدن، روسیه نینگ حمیمین مرکزیدن درا نینگ بحراننی کمه یتیریش منطقه سینی چیقریلگنلیگی حقیده بیانات بیریلدی.
درا نینگ انچه‌دن بیری نسبتاً تینچلیک و تاتوولیک ایچیده ایکنلیگی طفیلی منطقه خلقی نینگ ییریک قِسمی اوز اوی-جایلریده استقامت قیله‌یاتگن ایدی. لیکن روسیه، ایران و اسد تیزیمی نینگ درا‌گه قرشی عملیات باشله‌تیشی و هوا هجومی اویوشتیریشی منطقه اهالیسی نینگ کوپچیلیگی نینگ کوچیشیگه یول آچدی. شو دایره‌ده حاضرگچه 270 مینگدن آرتیق انسان اوز اوی-جایینی ترک ایتگن وضعیتده. اولر آره‌سیده 40 مینگ سوريه‌لیک نینگ اردون چیگره‌سیگه ییتیب باریب، اردون‌گه کیریشگه حرکت قیلگنلیگی بیرلشگن ملتلر تشکیلاتی تامانیدن قید ایتیلماقده. اردون نینگ 650 مینگ سوريه‌لیک مهاجرنی قبول قیلیشی آرتیدن، سوريه‌لیک مهاجرلر اوچون ینگی یاپیق دروازه سیاستی یولگه قوییلماقده‌دیر. اردون چیگره دروازه‌سی آرتیده‌گی سوريه‌لیکلر اوچون بشری یاردم کمپنیسی اویوشتیریشیگه قره‌مه‌ی، تیزیم کوچلری نینگ درا تامان ایلگریلشی تینچ اهالینی ییریک خوف آستیده قویدی. حالبوکی بیرلشگن ملتلر تشکیلاتی اردون‌نی دروازه‌لرینی آچیشگه چقیرگن ایدی.
حربي جهتدن درا‌ده روسیه، ایران و بشار الاسد تیزیمی کوچلری بیلن سوريه‌لیک مخالف اورته‌سیده اوروش دوام ایتماقده. تیزیم کوچلری نینگ تیزلیک بیلن لاجت منطقه‌سینی قولگه کیریتیشی آرتیدن بیر نیچه سوريه‌لیک مخالف گروه روسیه نینگ اورته‌مچیلیگی آرقه‌لی تیزیم کوچلری بیلن کیلیشیب آلدی. دا‌یل، بوسرا الشام و ابده شهرلریده‌گی مخالف قولیده‌گی قوراللرنی و شهرنی تیزیم کوچلریگه تاپشیردی. ایکّینچی تاماندن روسیه نینگ هوادن قوللب-قوّتلشی و امریکا قوشمه ایالتلری نینگ اوز یاردمینی توخته‌تیشی، قورال آرقه‌لی قرشیلیک کورسه‌تیشگه دوام ایتیشی سوريه‌لیک مخالفنی تیزیم کوچلری آلدیده انچه ضعیفله‌تماقده‌دیر.
جَنوبي سوريه‌ده‌گی وضعیت تأثیریده قالگن ایکّینچی دولت ایسه اسرائیلدیر. ایسرائیل نینگ عملیاتدن آلدین روسیه بیلن اوچره‌شوو اوتکزیب، ایران و ایران طرفداری جنگری‌لری نینگ عملیاتده اشتراک ایتمسلیگی باره‌سیده شرطنامه توزگنلیگی معلومدیر. لیکن اورته‌ده‌گی وضعیت ایران و ایراننی قوللب-قوّتله‌گن جنگریلر نینگ عملیاتده اشتراک ایتگنلیگینی کورسه‌تماقده. ایسرائیل نینگ بیر نیچه مراتبه ایران و ایراننی قوللب-قوّتله‌گن کوچلرگه قرشی هوا هجومی اویوشتیرگنلیگی و ایران طرفدارلری نینگ ایسرائیل چیگره‌سیگه یقینلشیشی، ایکّله مملکت اورته‌سیده ینگی بحران نینگ پیدا بولیشیگه یول آچیشی ممکن.
سیاست، اقتصاد و جمعیت تدقیقات بنیادی یازووچی جا‌ن اجون نینگ موضوعگه دایر ملاحظه‌لرینی اعتبارینگیزگه تقدیم ایتدیک.
