جهان بویلب کرونا ویروس واقعه سی سانی آزه یماقده

جهان ساغلیق نی سقلش تشکیلاتی, سونگّی بیر آیده کووید 19 واقعه سی سانی نینگ کمه ییب باریاتگن لیگی نی بیلدیردی. 

اوشبو تشکیلات, جاری آی نینگ 11- و 17- کون لری آره سیده گی کووید 19 بیلن علاقه لی راپوری نی ترقه تدی. 

راپورده خوددی شوو کون لر مابینیده جهان بویلب 18 مینگ 215 کیشی نینگ کرونا دن حیاتی نی یوقاتگن لیگی و 5,5 میلیون کیشی نینگ ایسه ویروس نی یوقتیریب آلگن لیگی بیلدیریلدی. 

اوتگن هفته بیلن سالیشتیریلگنده اپریل آیی نینگ 11- و 17- کون لری آره سیده کووید 19 واقعه سی سانی نینگ 24 فایز گه توشگن لیگی و مارچ آیی نینگ سونگّی هفته سی دن بیری ایسه خلق ارا مقیاسده کرونا واقعه لری سانی نینگ توشیب باریاتگن لیگی معلوم قیلیندی. 

جهان ساغلیق نی سقلش تشکیلاتی میلادی 2022- ییل 30- مارچ کونی ترقه تگن پلانیده ویروس بیلن علاقه لی قوییده گی اوچ سناریو دن بحث ایتگن ایدی:

بیرینچی سناریوده, بوندن کیین, قوشیمچه واکسین دوز لری گه کیره ک بولمه یدیگن شکلده آز یاکه هیچ تاثیری بولمه گن کووید 19 وریانت لری نینگ چیقیشی کوتیلماقده.

ایکّینچی سناریو اوله راق, ویروس نینگ اوزگریش گه دوام ایتیشی, لیکن واکسین لر نتیجه سیده آغیر کسللیک میزانی نینگ کمه ییشی کوتیلماقده.

اوچینچی سناریو ده ایسه, ویروس نینگ جوده یمان وریانت لری نینگ پیدا بولیشی و ینگی تهدید لر گه قرشی موجود واکسین لرنینگ فایده لی بولمس لیگی احتمالی باره سیده بحث ایتیلماقده. 

جهان ساغلیق نی سقلش تشکیلاتی باشلیغی تدروس ادهانوم, کووید 19 نینگ جاری ییل نینگ سونگّی گه قدر کنترول آستی گه آلینیشی نینگ ممکن ایکن لیگی نی معلوم قیلرایکن, اینگ یخشی سناریو نینگ عملی بوله آلیشی اوچون واکسین میزانی نینگ آرتیریلیشی نی توصیه ایتگن ایدی.