خلیلزاد پاکستانگه سفر قیلیب باردی

امریکا قوشمه ایالتلری نینگ افغانستان خاص نماینده سی زلمی خلیلزاد پاکستان نینگ پایتختی اسلام آبادگه سفر قیلیب باردی.

امریکا قوشمه ایالتلری نینگ اسلام آباد بویوک ایلچی لیگی تامانیدن بیریلگن بیاناتده، خلیلزادنینگ پاکستان سفری چوکاتیده ییر کوچلر  قومندانی قمر جاوید بجوا بیلن اوچره شگن لیگی بیلدیریلدی.

مذکور بیاناتده؛

"خلیلزاد امریکا قوشمه ایالتلری نینگ افغانستان تینچلیک جریانینی آلغه آلیب باریش اوچون دوام ایتیب کیلگن اورونیشلرنی کوریشر ایکن، افغانستان تامانلر اورته سیده گی مذاکره لرنینگ تیزده باشله شی، خشونت نینگ کمه ییشی بوییچه باسیم قیلیش اوچون پاکستاندن کمک سوره دی" دیب ایتیلگن.

خلیلزادنینگ عین دمده جنوری آییده افغانستانده آلیب قاچیریلگن لیگی ادعا ایتیلگن امریکالیک مارک فریش Mark Frerichs نینگ آزاد ایتیلیشینی تامین ایتیش اوچون هم اسلام آباددن همکارلیک سوره گن لیگی معلوم قیلینگن و پاکستانلیک عسکری مقاملرنینگ امریکا قوشمه ایالتلری گه همکارلیک لرینی تاکییدله گن لیکلری قید ایتیلدی.

امریکا قوشمه ایالتلری تشقی ایشلر وزیرلیگیدن بیریلگن یازمه بیاناتده، امریکا قوشمه ایالتلری نینگ افغانستان کیلیشوویدن مسؤل خاص نماینده بویوک ایلچی خلیلزادنینگ افغانستان تینچلیک اوچره شوولری دایره سیده قطر، هندوستان و پاکستان گه سفر قیلیش اوچون امریکادن اوچیب کیتگن لیگینی بیلدیرگندی.

بو بیاناتده،

"بویوک ایلچی خلیلزاد آلیب بارگن اوچره شوولریده خشونت نی تیزده توخته تیلیشی، افغانستان ایچکی مذاکره لری نینگ باشله شی اوچون تیزلشتیریلگن پروگرام و افغانستانده گی کوید-19 کسل لیگی گه قرشی کوره ش توغریسیده همکارلیک چقیریغی عملگه آشیره دی" دیب ایتیلگن.

خلیلزاد بیلن طالبان گروهی دفتری باشلیغی ملا عبدالغنی برادر، 7 می کونی قطرده تینچ جریانینی قولگه آلگن ایدیلر.