تورکیه نینگ مطبوعات خلاصه لری
تورکیه نینگ مطبوعات خلاصه لری
صباح گزیتهسی: «جمهور باشلیغی ایردوغان نینگ محلي واکسین بوییچه بیاناتی» سرلوحهسی بیلن خبر بیردی.
خبرگه کوره، تورکيه جمهور باشلیغی رجب طیب ایردوغان توناون کونی د-8 تشکیلاتی نینگ 10- جلسهسیده کروناویروسگه قرشی محلي واکسین بوییچه معلومات بیردی. «تورکيه صفتیده انسانلر اوستیده سینب کوریلگن محلي واکسینیمیزنی هیچ کیمدن ایهمسدن بوتون خلقلرنینگ فایدهلنیشیگه تاپشیرهمیز»،-دیب ایتگن.
ستار گزیتهسی: «آلمان نینگ فاز گزیتهسی: «تورک قوراللی درانلری آلمان قوشینینی تدبیر آلیشگه مجبورلهدی» ناملی مقاله چاپ ایتدی» سرلوحهسی بیلن خبر بیردی.
خبرگه کوره، آلمانده نشر قیلینگن Frankfurt Allgemeine Zeitung (فاز) گزیتهسی آذربایجان تامانیدن تاغلی قارهباغ اوروشیده قوللنیلگن تورکيه قوراللی درانلری (سی̇ها) ارمنستان نینگ 190دن آرتیق تانکینی و زرهلی واسطهسینی یوق قیلگنلیگی حقیدهگی خبرلر آلمان قوشینینی لرزهگه سالگنلیگینی یازدی. مقالهده تورک قوراللی درانلری نینگ اوستون موفقیتی آلمان قوشینینی بونگه قرشی تدبیر آلیشگه اوندهگنلیگی قید ایتیلدی.
یینی شفق گزیتهسی: «تورکيهدن 95 دولتگه چای صادر قیلیندی» سرلوحهسی بیلن خبر بیردی.
خبرگه کوره، جاري ییل نینگ جنوری-مارچ آیلری مابینیده تورکيهدن 95 دولتگه چای صادر قیلیندی. بو ییلگی صادرات مقداری اوتگن ییل نینگ عینِ دوریگه نسبتاً 23 فایزگه کوپ. قیمت جهتیدن ایسه 33 فایزدن آشدی. بوندن توشگن درآمد ایسه، 5 میلیون 124 مینگ دالرنی تشکیل قیلدی.
حریت گزیتهسی: «لا لیگهدن کپهدوکيا منظرهلی ایل کلهسیکو تقدیماتی» سرلوحهسی بیلن خبر بیردی.
خبرگه کوره، اسپانیاه بیرینچی فوتبال لیگی نینگ 30-هفتهسیده رئال مادرید بیلن برسیلونا اورتهسیده ایرتهگه، 10 اپریل کونی بولیب اوتهدیگن مسابقه آلدیدن کپهدوکيادن منظرهلر اورین آلگن ویدیو تصویر نمایش قیلیندی. ویدیو تصویرده تورکيه نینگ مهم توریستیک مسکنلریدن بیری کپهدوکياده ایسیق هوا بالونی اوستیده رئال مادرید و برسیلونا بیراقلری هیلپیرهگنلیگی کوزهتیلهدی.
خبر تورک گزیتهسی: «20-بوستون تورک فیلم فستیوالیگه سناقلی کونلر قالدی» سرلوحهسی بیلن خبر بیردی.
خبرگه کوره، امریکا قوشمه ایالتلریدهگی بوستون تورک فیلم فستیوالی 15-30 اپریل کونلری بولیب اوتهدی. مذکور فستیوال بو ییل کروناویروس پاندیميسی سببلی آنلاین شکلده عملگه آشیریلهدی. فستیوالده زمانوي تورک سینماسی نینگ یارقین نمونهلری امریکالیک تماشابینلر اعتباریگه حواله قیلینهدی.