تورکیه نینگ مطبوعات خلاصه لری

ستار گزیته‌سی: «تورکيه بیلن یقینلشیش اوچون رقابتگه کیردیلر» سرلوحه‌سی بیلن خبر بیردی.

خبرده یازیلیشیچه، عرب مطبوعاتی قطر چیکلاویگه چیک قویگن عرب دولتلری سعودی عربستان، بیرلشگن عرب امیرلیکلری، بحر‌ین و مصر تورکيه بیلن یقین علاقه‌ اورنه‌تیش اوچون بیر-بیری بیلن رقابتگه کیریشگنلیگینی یازدی. عرب مطبوعاتیده یازیلگن خبرلرگه کوره‌، مصر و بیرلشگن عرب امیرلیکلری یقین کیله‌جکده تورکيه‌ نینگ لیبیا‌ده‌گی طلب و منفعتلریگه ضد حرکت قیلمه‌یدی و لیبیا سیاستی بوییچه‌ فکریدن قَیتیشی ممکن.

صباح گزیته‌سی: «محلي درانلر کوزگه کورینمه‌گن خطر‌لرنی انیقله‌یدی» سرلوحه‌سی بیلن خبر بیردی.

خبرگه کوره‌، دنیاده تاباره‌ دقّت جلب ایتیب کیله‌یاتگن تورکيه درانلریگه قوشیمچه‌ تکنالوژیک تیزیم علاوه‌ قیلیندی. ایندیلیکده‌ تورکيه درانلریگه کیمیاوي، بیولوژیک، رادیولوژیک و هستوي تهدیدلرنی انیقلب بیرووچی ینگی تکنالوژي‌ اورنه‌تیلدی. نتیجه‌ده، درانلر هر قنده‌ی مشقتلی محیطده هم حرکتلنیب، اولچاو معلوماتلری بیلن خطر‌ درجه‌سینی انیق ییتکزیب بیره‌دی.

وطن گزیته‌سی: «روسلر تورک سمون بلیغینی یاقتیردی» سرلوحه‌سی بیلن خبر بیردی.

خبرده یازیلیشیچه، اوتگن ییلی شرقي قاره‌ دینگیزدن روسيه‌گه 10 مینگ 715 تُن‌ سمون بلیغی صادر قیلیندی. بوندن توشگن درآمد 49 میلیون 992 مینگ 254 دالرنی تشکیل قیلدی. بو 2019 ییلده عملگه آشیریلگن صادراتدن 198 فایز کوپ، قیمت جهتیدن ایسه 142 فایزدن آرتیق. 2019 ییلی عینِ حدوددن روسيه‌گه 3 مینگ 595 تُن‌ سمون بلیغی صادر قیلینگندی. اوندن 20 میلیون 670 مینگ 358 دالر فایده‌ قولگه کیریتیلگندی.

یینی شفق گزیته‌سی: «بنگلدیشلیکلر بیپنی ترجیح قیلدی» سرلوحه‌سی بیلن خبر بیردی.

خبرگه کوره‌، و‌تساپ نینگ ینگی سیاستی طفیلی فایده‌لنووچیلرنینگ بیپ کمپنیسیگه بولگن قیزیقیشیده کیسکین آرتیش کوزه‌تیلدی. بیپ بنگلدیشلیک فایده‌لنووچیلر تامانیدن اینگ کوپ قیزیقیش کوریلگن مسسینجر کمپنیلریدن بیری بولدی.

خبر تورک گزیته‌سی: «مسعود اوزیل استانبولگه ییتیب کیلدی» سرلوحه‌سی بیلن خبر بیردی.

خبرگه کوره‌، انگلستان نینگ ارسینال کلوپیدن اجره‌لگن تورک فوتبالچی مسعود اوزیل فنرباغچه بیلن شرطنامه‌ امضاله‌دی. توناون آقشام استانبولگه ییتیب کیلگن اوزیل: «مینینگ آرزوم رویابگه چیقماقده»،دیدی. مشهور تورک فوتبالچی فنرباغچه جماعه‌سیگه تره‌نسفر بولدی.