تورکیه نینگ مطبوعات خلاصه لری
تورکیه نینگ مطبوعات خلاصه لری
تورکیه نینگ مطبوعات خلاصه لری
ستار روزنامه‌سی: «آذربایجان بیلن تورکيه اورته‌سیده‌گی سودا حجمینی 15 میلیارد دالرگه چیقریش کوزده توتیلماقده» سرلوحه‌سی بیلن بیرگن خبرده یازیلیشیچه، تورکيه دولت باشلیغی رجب طیب ایردوغان توناون باکوگه سفری چاغیده آذربایجان دولت باشلیغی الهام علی یف بیلن اوچره‌شدی.
ایکّی ییتکچی اوچره‌شووده تورکيه-آذربایجان مناسبتلرینی کوزدن کیچیردی. شونینگدیک، آذربایجان و تورکيه اورته‌سیده‌گی سودا حجمی 2019 ییلی 4 یریم میلیارد دالر ایکنلیگی، 2020 ییلده ایسه بو حجمنی 15 میلیارد دالرگه چیقریش مقصد قیلینگنلیگی قید ایتیلدی.
یینی شفق روزنامه‌سی:«تورکيه ناتو نینگ « Dynamic Manta 2020» حربی سینشلریده اورین آلدی» سرلوحه‌سی بیلن بیرگن خبرده یازیلیشیچه، سیجیلیا آرالی نینگ شرقي ساحللریده « Dynamic Manta 2020» حربی سینشلری اوز ایشینی باشله‌دی. اوشبو حربی سینشلر ناتونینگ سوو آستی کیمه‌لرگه قرشی هوا، سوو اوستی و دینگیز آستیده‌گی همکارلیکنی رواجلنتیریش، اوروشگه تیارگرلیک قابلیتینی آشیریشنی مقصد قیله‌دی.
تورکيه دینگیز کوچلری ناتو حربی سینشلریده آلدین صفلر‌دن جای آلدی و تورکيه حربی سینشلرگه کتّه حصه قوشگن دولتلردن بیری بولدی.
صباح روزنامه‌سی:«ادلبگه تانکلر و اوبوس راکتلرینی یوباریش دوام ایتماقده» سرلوحه‌سی بیلن بیرگن خبرده یازیلیشیچه، تورکيه قوراللی کوچلری تورکيه-سوريه چیگره‌سیده‌گی حربي کوچلرگه قوشیمچه زره‌لی واسطه‌لر یوباریشنی دوام ایتتیرماقده.
تخمیناً 20 ته واسطه ده حربي اوبوس راکتلری و 10 ته تانکدن عبارت حربي قطار سوريه چیگره‌سیگه ییتیب کیلدی. اولر چیگره‌دن سوريه تامانیگه آلیب اوتیله‌دی و ادلبده‌گی تورک کوزه‌توو قرارگاهلریگه تاپشیریلیشی کوتیله‌دی.
حریت روزنامه‌سی: «تورکيه‌ده بار معدنیدن لیتیوم ایشلب چیقریله‌دی» سرلوحه‌سی بیلن بیرگن خبرده یازیلیشیچه، تورکيه دنیا مقیاسیده گی بار ذخیره‌سی نینگ 70 فایزیگه ایگه. بار معدنی ترکیبیده لیتیوم مادّه‌سی بارلیگینی معلوم قیلگن تورکيه انرژی و طبيعي منبعلر وزیری فاتح دونمیز: «برقلی مو‌ترلر نینگ اینگ نازک جایی بطری‌لریدیر. لیتیوم بطری‌لر بو جریانده کتّه اهمیتگه ایگه. بار معدنی ترکیبیده‌گی لیتیوم مادّه‌سینی اجره‌تیب آلیب، اوندن فایده‌لنه‌میز»، دیدی.
وزیر نینگ تأکیدلشیچه، تورکيه‌ده جاري ییلده بار معدنیدن لیتیوم ایشلب چیقره‌دیگن فابریکه قوریلیشی ریجه‌لنماقده.
خبر تورک روزنامه‌سی: «THY ختای و ایران پروازلر بوییچه ایضاح بیلدیردی» سرلوحه‌سی بیلن بیرگن خبرده یازیلیشیچه، تورک هوا یوللری ختایگه پروازلرنی 29 فبروریگه قدَر توخته‌تدی. ایرانگه پروازلر حقیده ایضاح بیلدیرگن THY، پایتخت تهراندن تشقری، مملکتده‌گی برچه شهرلرگه عملگه آشیریله‌یاتگن پروازلر 10 مارچگه قدَر توخته‌تیلگنلیگینی اعلان قیلدی.
