بیرلشگن ملتلر تشکیلاتی طالبان باشقرووینی قاره له دی

بیرلشگن ملتلر تشکیلاتی افغانستان ده گی طالبان باشقرووینی خاتین – قیزلرنینگ بیرلشگن ملتلر تشکیلاتی بیلن ایشلشی گه توسیق کیریتیشینی قاره له دی.

بیرلشگن ملتلر تشکیلاتی نینگ بوگون خوفسیزلیک کینگشیده رای گیرلیک بولیشی کوتیلگن لایحه ده طالبان نینگ افغانستان ده خاتین – قیز و قیز باله لرنینگ انسان حقلریگه و اساسی ایرکینلیکلرینی قولیدن آلیشی طفیلی خواطرده ایکن لیگی بیلدیریلدی.

لایحه ده طالبان نینگ تعلیم، استخدام، حرکت ایرکین لیگی و عمومی حیاتده تینگ قتنشیش حقلرینی تیزلیک بیلن قیته بیریلیشی بوییچه چقیریق قیلندی.

شونده ی بولیب بیرلشگن ملتلر تشکیلاتی گه اعضا برچه اولکه لرگه طالبان نینگ خاتین – قیز و قیز باله لرگه قره ته پولیتیکاسی و عمللری نینگ «تیزلیک بیلن عکسینچه عملی قیلینیشی» توغریسیده کوچلریدن ایش آلیب اورونیشلرینی تکلیف ایتدی.

بیرلشگن عرب امیرلیکلری و جاپان تامانیدن تیارلنگن قرار لایحه سی نینگ بوگون 15 اعضالیک کینگش تامانیدن رای بیریلیشی کوتیلماقده.

روسیه بیلن چین بیطرف بولیشی کوتیله یاتگن بولسه ده لایحه نینگ قبول یولیب چیقیشی انیق دیب حسابلنه دی.

طالبان 2021 ییلی 15 اگستده افغانستان باشقرووینی قولگه کیریتیب آلیشی بیلن اولکه ده خاتین لرنینگ ایشلشی و قیزلرنینگ تعلیم – تحصیل آلیشی گه چیکلاو کیریتگندی.

بیرلشگن ملتلر تشکیلاتی افغانستان یاردم کمیشنرلیگی (یوناما) افغانستان نینگ ننگرهار ولایتیده بیرلشگن ملتلر تشکیلاتی گه باغلیق افغان خاتین پرسونل نینگ ایش گه باریشی گه توسیق بولگن لیگینی بیلدیرگندی.