طالبان بیلن اروپا بیرلیگی هیئاتلری اورته سیده اوچره شوو بولیب اوتدی

طالبان نینگ اوتیش دوری حکومتی، افغانستانده گی قونلغه لر توغریسیده اروپا بیرلیگیدن یاردم طلب ایتدی.

اروپا بیرلیگی بیلن طالبان اورته سیده اوتگن کونی قطرنینگ پایتختی دوحه ده انسانی یاردم قاله ویرسه قونلغه لرنینگ آچیلیشی، قیز باله لرنینگ تعلیمی کبی تورلی موضوعلرده اوچره شوولر بولیب اوتدی.

ایککی کون دوام ایتگن اوچره شوولرده اروپا بیرلیگی هیئاتی گه افغانستان خاص نماینده سی توماس نیکلاسون، افغانستان هیئاتی گه ایسه طالبان اوتیش دوری حکومتی تشقی ایشلر وزیری اورینباسری امیرخان متقی باشچیلیک قیلدی.

اروپا بیرلیگی کمیسیونی تامانیدن بیریلگن بیاناتده اوچره شوونینگ "لروپا بیرلیگی نینگ طالبان حکومتینی رسمی روشده تن آلگن لیگی معناسیگه کیلمه گن لیگی" تاکییدلندی.

بیاناتگه کوره اوچره شوولرده ایککی تامان هم افغانستانده گی قونلغه لرنینگ آچیلیشی نینگ اهمیتی نی تیلگه آلدی. اوتیش دوری حکومتی قونلغه لرنینگ فعال قیلینیشی اوچون اروپا بیرلیگیدن یاردم طلب ایتدی.

تامانلر عین دمده افغانستانده تاباره یمانلشیب بارگن انسانی وضعیت بیلن تیگیشلی خواطرلرینی تیلگه آلدی. اروپا بیرلیگی تامانی افغانستان خلقی انسانی یاردم ییتکیزیب بیریش نیتینی افاده ایترکن اوتیش دوری حکومتی دولت پرسونللریگه آیلردن بیری معاش توله آلمه گن معاشلرینی تولش تعهدینی ایسله تیب اوتدی.

اروپا بیرلیگی انسانی یاردملرگه قوشیمچه اوله راق خلق ارا تشکیلاتلر و نادولت تشکیلاتلر آرقه لی تعلیم و ساغلیقنی سقلش کبی ساحه لرده توغریدن توغری افغانستان خلقی نینگ منفعتی گه بوله دیگن شکلده جدی مقدارده مادی یاردم بیریش نی آرزوله گن لیگینی بیلدیردی.

اروپا بیرلیگی نینگ بیاناتیده قیز و ایرکک باله لرنینگ خلق ارا استندردلرگه مناسب بیر مفردات بیلن تعلیملریگه تینگ بیر شکلده دوام ایتیشی نینگ اهمیتی گه تماس قیلدی و "اروپا بیرلیگی هیئاتی، افغانستان هیئاتی نینگ قیز و ایرکک باله لرگه تعلیم بیلن بیر قطارده خاتین – قیزلرنینگ ایریم سکتورلرده ایش تامین ایتیش نیتینی ممنونیت بیلن کوتیب آلدی" دییلدی.

افغان هیئاتی حقوق نینگ اوستونلیگینی و یخشی باشقرووگه بولگن تعهدینی ایسله تیب اروپا بیرلیگی تامانی دموکراسی نینگ اهمیتی گه تماس قیلیب کینگ کولملی بیر حکومت ایجاد ایتیلیشی و اساسی قانون اصلاحاتی کیلتیریلیشی بوییچه چقیریق قیلدی.

اولکه ده گی دیپلوماتیک ارگانلرنینگ موجودیتی باعث ممنون ایکن لیگینی تیلگه آلگن طالبان هیئاتی اروپا بیرلیگی دیپلوماتلری نینگ اولکه گه قیتیب کیلیشیدن خرسند بوله جکلرینی اورله دی.

اروپا بیرلیگی تامانی هم پایتخت کابلده کم سانده بیر موجودیت تامین ایتیش احتمالینی اشاره قیلدی. بونینگ طالباننی رسمی روشده تن آلیش معناسیگه کیلمس لیگی، بونگه خوفسیزلیک وضعیتی گه قره ب قرار بیریله جگی بیلدیریلدی.