امریکا کابل ده گی دیپلوماتیک فعالیت لرینی توخته تیب قویدی

امریکا قوشمه ایالتلری تشقی ایشلر وزیری انتونی بلینکن بوگوندن اعتباراً افغانستان نینگ پایتختی کابلده گی دیپلوماتیک موجودیتلرینی توخته تیب قویگن لیکلرینی و فعالیتلرینی قطرنینگ پایتختی دوحه گه تشیگن لیکلرینی بیلدیردی.

بلینکن امریکا قوشمه ایالتلری مرکز کوچلری (CENTCOM) قومندانی جنرال کنت مک کنزی نینگ امریکا قوشمه ایالتلری کوچلری نینگ افغانستاندن چیقیش جریانی نینگ تماملنگن لیگی خبرینی بیریشی نینگ آرتیدن مطبوعاتی کنفرانس اویوشتیردی.

بلینکن تخلیه عملیاتلری دایره سیده 6 مینگ ته سی امریکا تبعه سی بولیب 123 مینگ اطرافیده نفرنی افغانستاندن چیقرگن لیکلرینی قید ایتدی.

بلینکن افغانستان توغریسیده دیپلوماسینی قولدن بیرمس لیکلرینی تیلگه آلیب شولرنی ایتدی:

"حربی وظیفه میز اداغگه ییتدی، ینگی بیر دیپلوماتیک وظیفه باشله دی. اولاً بو دیپلوماتیک وظیفه نی آلیب باریش اوچون ینگی تیم ایجاد ایتدیک. بوگوندن اعتباراً افغانستان نینگ پایتختی کابلده گی دیپلوماتیک موجودیتلریمیزنی توخته تیب قویدیک و فعالیتلریمیزنی قطرنینگ پایتختی دوحه گه تشیدیک. یقین پیتده بو موضوعی توغریسیده کنگره گه معلومات بیره میز" دیدی.

افغانستانده شو وقت چیت ایلگه چیقماقچی بولگن 200 دن آز بلکه 100 کیشی اطرافیده امریکا قوشمه ایالتلری تبعه سی قالگن لیگی گه ایشانگن لیکلرینی معلوم قیلگن بلینکن بو اولکه دن چیقماقچی بولگن امریکا تبعه لری و افغانستانلیک اورتاقلرگه یاردم ایتیشلریدن خبر بیردی.

توناون کونی بعضی بیر کسبداشلری بیلن افغانستاندن خوفسیز سیاحت نی تامین ایتیش و کابل ملی قونلغه نینگ ممکن درجه ده وقتراق فعالیت گه آچیلیشی موضوعلرینی تیلگه آلگن لیکلرینی قید ایتدی.

"بو توغریده تورکیه بیلن قطرنینگ اورونیشلریدن منتدارمیز. بو اورونیشلر کم سانده چارتر اوچیشلرنی تامین ایته دی و افغانستاندن چیقماقچی بولگنلرگه یاردمچی بوله دی" دیب گپیردی.