iman éytqan we yaxshi emellerni qilghanlar astidin östenglar éqip turidighan jennetke kiridu

türkiye awazi radiyosi: nisa sürisi, 122 – 127 - ayetler.  iman éytqan we yaxshi emellerni qilghanlarni astidin östenglar éqip turidighan jennetke kirgüzimiz. ular jennette menggü qalidu. allahning wedisi heqtur, allahtinmu rast sözlük kim bar? (yeni allahtinmu rast sözlük héch ehedi bolmaydu)[122]. (allah wede qilghan sawab) silerning quruq arzuyunglar we ehli kitabning quruq arzusi bilen qolgha kelmeydu, kimki bir yamanliq qilidiken, buning üchün (dunyada yaki axirette) jazalinidu, u özi üchün allahtin bashqa (allahning azabidin qutulduridighan) héchqandaq dost we héchqandaq medetkar tapalmaydu[123]. er ـ ayallardin mömin bolup turup yaxshi ishlarni qilghanlar jennetke daxil bolidu, ulargha qilche zulum qilinmaydu (yeni ularning qilghan emellirining sawabi qilche kémeytiwétilmeydu)[124]. yaxshi emellerni qilghan halda özini allahqa tapshurghan (yeni allahning emrige boysunup emelini xalis allah üchün qilghan), batil dinlardin buralghan halda ibrahimning dinigha egeshken kishidin (diniy jehette) yaxshiraq adem barmu? allah ibrahimni dost tutti[125]. asmanlardiki, zémindiki sheyilering hemmisi allahningdur (yeni allahning mülkidur, bendiliridur, mexluqatliridur). allah hemme nersini toluq bilgüchidur[126]. (i muhemmed!) sendin ayallar toghrisida petiwa soraydu, éytqinki, ular toghrisida allah silerge petiwa béridu. quranda silerge tilawet qilinidighan (ayallarning mirasigha ait) ayetlermu petiwa béridu. shundaq yétimler toghrisida petiwa bériduki, ularning teyin qilinghan mirasini bermeysiler, (ularning mirasi qolimizdin chiqip kétip qalidu-dep) ularni erge bermeysiler (yeni mundaq qilmasliqinglargha petiwa béridu), bozek qilinghan balilar (ning heqqini bérishinglar) we yétimlerge heqqaniy bolushinglar heqqide petiwa béridu. (ayallargha we yétimlerge) qandaqla yaxshiliq qilsanglar, shübhisizki, allah uni bilip turidu (yeni shuninggha asasen allah silerni mukapatlaydu)[127].