فلسطینی انتظامیہ گمشدہ اسرائیلی نوجوانوں کی تلاش میں مدد کر رہی

فلسطین کے صدر محمود عباس نے کہا ہے کہ ان کے حفاظتی دستے اُن تین اسرائیلی نوجوانوں کی تلاش میں مدد فراہم کر رہے ہیں جنہیں مبینہ طور پر حماس کے عسکریت پسندوں نے اغوا کر لیا تھا۔
اُن کا کہنا تھا کہ یہ تینوں نوجوان انسان ہیں اور فلسطینی حکام انسانی جانوں کو بچانا چاہتے ہیں۔
لیکن جناب عباس نے اسرائیلی وزیراعظم بن یامین نیتن یاہو پر الزام عائد کیا کہ وہ بظاہر اغوا کے اس واقعے کو فلسطینی عوام کو نقصان پہنچانے کے لیے استعمال کر رہے ہیں۔
ان کا کہنا تھا کہ فلسطین اسرائیل کے ساتھ اس طرح کا تصادم نہیں چاہتا۔
یاد رہے کہ یہ تین نوجوان مغربی کنارے میں گزشتہ ہفتے اسکول سے واپسی پر لاپتہ ہوگئے تھے۔